Psalm 48 - De Beebaa Dabu

Se daahili. Se Psalm nii de aamuli o Korah

¹ Tagi Maolunga e maolunga mmao, gai e heohi de hagalaumalie dono tuhi i lo te aduhale o taadeu Maadua. Dono mounga dabu

² e mahamaha gai e maolunga, go de mommee e malangilangi ai henua i lalo alodahi, go de mounga go Zion, e duu laa i baasi ngaiho, go de aduhale o de Hodooligi maolunga.

³ De Maadua gu noho i ono hale buibui makaga, ia gu hagaago mai bolo go ia de mommee buibui makaga.

⁴ Tilo, denga hodooligi gu hagabuni, gilaadeu gu buni ma e loomai ai alodahi.

⁵ De masavaa alaadeu ne gidee ai de aduhale laa, gai gilaadeu gu llele mouli; gilaadeu ne saavini ga hulo i delaadeu maatagu.

⁶ Gilaadeu gu manavasaa mmao, bei dagodo o de hine gu hai ono hagalangona.

⁷ Koe gu oha vaga o Tarshish i de madangi mai i dua.

⁸ Gimaadeu gu langona, ma de gidee i lo te aduhale o Tagi o denga hagabuulinga hebagi, ma lo te aduhale o demaadeu Maadua; de Maadua gu hai de aduhale laa gi dagodo ga hano ai. Selah

⁹ De Maadua, gimaadeu gu maanadu dagodo o doo abodonu, i demaadeu tuu i lo too temple.

¹⁰ De Maadua, doo tuhi e dae gi henua i lalo alodahi; bei dagodo oo ingoo: gai doo lima madau e honu i de heohi.

¹¹ De mounga go Zion gi malangilangi! Dangada alodahi i Judah gi lodo malangilangi i hiidinga o dau hagamodu heohi!

¹² Hannoo seesee saele i Zion, gai holiagina luu baasi, ga dau taelodo o ono hale dagitilo maolunga;

¹³ ma de tilo dagodo o dono buibui, ma de hulo laa lodo ono hale buibui makaga; gi maua ai e goodou i de tala ange gi de atangada i muli mai,

¹⁴ bolo deenei de Maadua, taadeu Maadua, ga hano ai e dee ngado mai. Go ia e dagina gidaadeu ga hano ai.