Psalm 45 - De Beebaa Dabu

Ange gi tagi o taahili; e hua bei de leo o “Denga lilii”. Se Maskil nii de aamuli o Korah ; se daahili niio de hagadau aaloha

¹ Ogu lodo gu honu malingilingi i muna hagamalangilangi; au e hua ange agu daahili gi de hodooligi; gai dogu alelo e bei de biini sisi a tangada labagau i de sisi.

² Koe e mahamaha ange i denga daane; au muna e tala iai de abodonu, deelaa ai, de Maadua gu hagamanuuia goe ga hano ai.

³ Taane mmahi, daulia dau gadilaasa i honga doo dege; gai hakahu ina goe i de mahamaha ma de hagadubu.

⁴ Savini i honga de hoosa i de mahamaha gai koe gi kii, i de muna abodonu, ma de daudonu, aama de mee heohi; gai koe gi hagaagona mai hegau hagalele mouli a doo lima madau e hai.

⁵ Dao o dau mee hholu e kangi i de tili gi ulu gi lodo o oo hagadaumee, e de hodooligi; gai denga huaahenua gu nnoho i oo lalo.

⁶ De Maadua, doo nohoanga e dagodo ga hano ai e dee ngado mai. De laagau o doo nohoanga hodooligi go de laagau o de hagamodu heohi.

⁷ Koe e lodo i de mee heohi gai e kino i de baubau. Deenei ai, de Maadua, doo Maadua, gu hai goe gi maolunga ange i oo soa ange laa, i dana hagasulu goe i de lolo o de malangilangi.

⁸ Oo malo alodahi e hagamanongi i myrrh ma aloe aama cassia. Denga mee hagadangidangi iai daula mai i denga hale ivory e hagamalangilangi goe.

⁹ Hanu oo haahine hagadubu ni damaa hine nii denga hodooligi; de hine hodooligi e duu i doo baasi madau ma ono malo goolo mai i Ophir.

¹⁰ Tamaa hine, hagalaangona ma gi hagasaelea, hagangalo ina oo dangada aama doo huaabodu;

¹¹ gai de hodooligi ga malangilangi i doo mahamaha. Koe gi ino ange gi de ia, i hiidinga go ia doo dangada aamua.

¹² Dangada o Tyre e gaamai naa gi de goe denga mee ngadi gaavange; de gau lava e hagatale naa de hai goe gi malangilangi i gilaadeu.

¹³ Tamaa hine a de hodooligi e mahamaha mmao i lo tono aabi; gai ono malo e llanga i goolo.

¹⁴ Ia e gahu i malo maaga hagalaagii ga dagi ai gi daho de hodooligi, ono soa go denga bua mmoe e daudali mai i ono dua, ma de gaamai ia gi oo daha.

¹⁵ Gilaadeu e malangilangi ma de llodo danuaa i de masavaa alaadeu e dagi mai ai ia, ga ulu gi lo te hale o de hodooligi.

¹⁶ Au dama daane e kave naa tuulanga o olaadeu damana; koe e hai naa gilaadeu gi ni dagi i honga de henua alodahi.

¹⁷ Au e hai naa denga atangada alodahi gi manadua goe; deenei ai, denga huaahenua e tuhi naa goe ga hano ai e dee ngado mai.