Psalm 40 - De Beebaa Dabu

Ange gi tagi o taahili. Se Psalm nii David

¹ Au ne golomagi ogu lodo ga tali ai Tagi Maolunga; gai ia ne hagabaa mai ga hagallongo dagu dangi.

² Ia ne dada age au i lo te geelonga hagamanavasaa, go de mommee iai bela pigi; gai ia ne hai au gi duu i honga dahi hadu makaga, ma de hai luoogu vae gi tuu i honga de mommee makaga.

³ Ia ne hai au gi daahili i dahi daahili hoou, se daahili e tuhi ai taadeu Maadua. Dangada soa e maatagu naa i delaadeu gidee, gai gilaadeu e hagadonusia naa Tagi Maolunga.

⁴ E manuuia tangada e hagadonusia Tagi Maolunga, gai e dee ssala dono bale i daho de gau lodo maolunga, go gilaadeu e daudali ange i denga ngadi diinonga.

⁵ Tagi Maolunga dogu Maadua, gu lagolago au hegau hagalele mouli ne hai, go au mee gu hagadabena mai gi gimaadeu; e deai ange donu e bei oo dagodo! Gai ga daalaa naa donu e au dagodo o au hegau, gai au e dee maua donu i de tala gi odi.

⁶ Koe e dee lodo i sigidaumaha ma mee ngadi gaavange, gai koe gu hhuge luoogu dalinga. Koe tee hai au gi haia ssigidaumaha dudu ma ssigidaumaha o haisala.

⁷ Gai au ne hagadaba, “Tilo, au gu humai e hai oo lodo, bei de hai gu sisi ai laa ogu dagodo i lo te beebaa mulo.

⁸ Dogu Maadua, au e lodo e daudali i dau hagatau; au hainga gu daakodo i ogu lodo.”

⁹ Au ne tala de longo danuaa o doo heohi ange gi de hagabuulinga soa; au e dee hagapuni donu dogu ngudu, Tagi Maolunga, koe e iloo donu mee nei!

¹⁰ Au tee daohi donu huu doo heohi i ogu lodo, gai au ne tala dagodo o doo hai hegau i de muna abodonu aama dau hagaola; au tee hagammuni donu dagodo o doo abodonu ma doo heohi i doo hagabuulinga soa.

¹¹ Tagi Maolunga, koe gi dee gaavee gee doo lodo aloha i de au, gai doo abodonu ma doo heohi go dogu buibui i masavaa alodahi.

¹² I hiidinga hai ngadaa lagolago gu duuli au; ogu baubau gu aahe mai donu gi de au, au gu dee maua i de galo ange e tilo. Ogu baubau gu lagolago ange i ngaangaaulu o dogu biho; gai au gu deai sagu tali.

¹³ Tagi Maolunga, koe gi malangilangi i de hagaola mai au; Tagi Maolunga, koe gi hagamoolau balea mai au.

¹⁴ Haia gi dookaa ma de ssenga ange gilaadeu e saalaa de hai e daa ai au gi magau. Haia gi aahe dua ma de dookaa dangada alodahi e llodo e hai mai de baubau gi de au.

¹⁵ Gai haia gi dookaa ma de ssenga ange gilaadeu e hai mai gi de au, “Gu vakaa loo! Gu vakaa loo!”

¹⁶ Aagai haia dangada alodahi e saalaa goe gi malangilangi ma de llodo danuaa i de goe; gai dangada e llodo i dau hagaola gi hagataba i masavaa alodahi, “Hagaamua ina Tagi Maolunga!”

¹⁷ Gai ogu dagodo, au se dangada hagaau aloha ma de duasala; gai de Ia Aamua gi manadua mai au. Go koe dogu bale aama dogu Ia Hagaola; dogu Maadua, koe gi dee hagammule mai!