Psalm 4 - De Beebaa Dabu

Ange gi tagi o taahili; e hua madali denga mee hagadangidangi iai daula. Se Psalm nii David

¹ Dogu Maadua heohi, basa mai gi de au, i de masavaa aagu e hagahi adu ai goe! Koe gi hagamaamaane ina ogu lodo i dogu duasala. Degi mai gi de au mage hagalaangona dagu dalodalo.

² Dangada, dee hee maa taulooloa doodou hagangadi mee au? Gai dee hee maa taulooloa doodou tala hanu ngadi muna, ma de ssala muna hagasenga? Selah

³ Goodou gi iloo bolo Tagi Maolunga e vvae tangada heohi gi se dangada niiona; Tagi Maolunga e hagallongo dagu dalodalo i de masavaa aagu e hagahi ange ai ia.

⁴ Goodou llili, aagai goodou gi dee haisala; goodou hagasaelea mee nei i honga oodou moenga; goodou gi iloo dagodo o oodou lodo gai goodou ga dee muu. Selah

⁵ Haia denga sigidaumaha heohi, gai gi hagadonusia Tagi Maolunga.

⁶ E soa dangada e hagataba, “Goai e haia mai tanuaa gi gimaadeu? Tagi Maolunga, haia de maalama o luoo mada gi hagamaalama ina gimaadeu!”

⁷ Koe gu hai gi kii ange de laumalie dogu malangilangi i de malangilangi o dangada i de masavaa e lagolago ai grain ma tau uvaini.

⁸ Au e dagodo iho ga seni i de baba; go hiidinga go koe donu huu Tagi Maolunga, e maua i de hai au gi noho baba.