Psalm 39 - De Beebaa Dabu

Ange gi tagi o taahili, go Jeduthun. Se Psalm nii David

¹ Au ne hagadaba, “Au e dagitilo naa ogu haiava ma de daohi dogu alelo gi dee haisala; au e nnoa naa dogu ngudu i taulooloa de nnoho o de gau baubau i dogu mommee iai.”

² Aagai de masavaa oogu e noho ai ga dee muu, ma tee tala hanu muna danuaa; gai au gu kii ange tee baba ogu lodo.

³ Ogu lodo gu dee baba mmao; gai ga hagasaelea huu e au mee nei, gai ogu lodo gu bei de ahi ula; gai au ga basa ga hagadaba:

⁴ “Tagi Maolunga, hagaagona mai de hagaodi o dogu mouli, ma taelodo o laangi oogu e mouli ai; haia gi donu ange au dagodo de moolau de odi o dogu mouli.

⁵ Tilo, koe ne hai gi podo ogu laangi bei dahi ianga, gai ogu ngadau e mouli ai e bei donu teai i oo daha. Ni muna abodonu, de mouli o dahi e bodobodo donu huu bei de madangi o de manava. Selah

⁶ Ni muna abodonu, tangada e seesee saele bei dagodo o dahi goohunga; ni muna abodonu, ana hegau e deai donu haigamaiana; ia e hagabudu goloa lagolago, gai ia e dee iloo be goai e mee ai.

⁷ Dogu Ia Aamua, goai aagu e tali ange aagena? Au e tali hagalodolodo adu gi de goe.

⁸ Hagaola ina mai au i ogu haisala alodahi; koe gi dee dugu ange de gau llodo ssenga gi kada i de au.

⁹ Au ne dee muu; au tee tala hanu muna, i hiidinga go koe donu ne haia de mee nei.

¹⁰ Duudia dau hagailiili au; au gu dee vaangalue i de kona dau hagailiili au.

¹¹ De masavaa aau e haele ai dangada ma de hagasee gilaadeu i hiidinga olaadeu haisala, gai koe e oha ono goloa hagamogomogo bei hegau a de goa. Ni muna abodonu, dangada alodahi e bei donu huu de madangi o de manava. Selah

¹² Tagi Maolunga, hagalaangona dagu dalodalo, hagalaangona dogu dangi adu koe gi balea mai; koe gi dee hagangadi mee ina dogu dangi. Go hiidinga au se dangada e noho gaainga gai se dangada henua gee bei ogu dubuna madagidagi alodahi.

¹³ Koe gi dee hagaduasala ina au, gi ahe ange ai au gi malangilangi, i mua dogu hano ga dee maleva.”