Psalm 38 - De Beebaa Dabu

Se Psalm nii David , ange gi ssigidaumaha o de hagamaanadu

¹ Tagi Maolunga, koe gi dee hagasee ina loo au i doo lili aabe gi haelea mai au i doo bole.

² Dao o dau mee hholu gu pigi i dogu angaanga, gai doo lima gu hagaili au.

³ Gu deai donu mahi i lo togu angaanga, i hiidinga koe gu bole; au gu kona mmao dogu magi i hiidinga o ogu haisala.

⁴ Au gu dee bau ange gi ogu mee gu haisala ai; gai gu bei dagodo o de mee hagauda daemaha.

⁵ Ogu maanuga gu pilo ma de augaua i hiidinga dogu lodo senga.

⁶ Au gu ino luoogu mada gi honga de gelegele; gai au e daemaha mai i taiao ga boo ai.

⁷ Dogu angaanga gu vvela mmao, gai gu deai mahi o dogu angaanga.

⁸ Au gu baageaa ma tee vaangalue; gai au gu gonogono i hiidinga taemaha o ogu lodo.

⁹ Dogu Ia Aamua, ogu lodo alodahi e maahuge adu gi de goe, gai koe e iloo dogu manava i lunga.

¹⁰ Ogu lodo gu bonabona age, gai gu deai ogu mahi; gai gu deai hogi se maalama i luoogu mada.

¹¹ Ogu soa ma gilaadeu e heloongoi mai gu dee aanga mai gi de au i dogu magi, gai dangada e paa mai gu hagammao gee i de au.

¹² Gilaadeu e llodo e daa au gi magau gu dugu alaadeu sele, gilaadeu e hagatau delaadeu hai e hagalagohia ai au; gilaadeu e hagatau delaadeu hai e daahanga ai dangada mai i taiao ga boo ai.

¹³ Gai au e bei tangada longoduli, e dee langona laa, ma dagodo o tangada e dee maua i de basa.

¹⁴ Au gu bei dagodo o tangada longoduli, aama tangada e dee maua i de basa.

¹⁵ Tagi Maolunga, go koe dagu tali hagalodolodo; go koe, dogu Ia Aamua ma dogu Maadua, e basa mai gi dagu dalodalo.

¹⁶ Au e hagadaba, “Aude dugua ange gilaadeu gi kada i de au, ma de pasa hagamaolunga i de masavaa oogu e baguu ai.”

¹⁷ Au gu dai baguu donu, gai au e mmae i masavaa alodahi.

¹⁸ Au e tala adu dagodo o ogu baubau; au gu dee baba i ogu haisala.

¹⁹ Ogu hagadaumee e mmahi mmao, gai e soa gilaadeu e kino i de au i teai hiidinga.

²⁰ Dangada e sui mai agu hegau danuaa i de baubau e hagabaubau au i hiidinga dogu hagammahi e hai tanuaa.

²¹ Tagi Maolunga, koe gi dee dilia loo au! Dogu Maadua, koe gi dee hagammao gee i de au!

²² Hagamoolau humai balea mai au, de Ia Aamua dogu Ia Hagaola!