Psalm 37 - De Beebaa Dabu

Se Psalm nii David

¹ Aude manavasaa oo lodo i hiidinga o dangada e haia de baubau aabe gi lodo gaiaa ange gi gilaadeu e haia mee dee heohi;

² go hiidinga gilaadeu e bei denga helii e moolau laa de mmae, ma denga manu ssomo vaaligiligi e moolau laa de maakau.

³ Koe gi hagadonusia Tagi Maolunga ma de hai tanuaa; gai koe ga noho baba i honga de henua ga gaimee ai.

⁴ Koe gi malangilangi i Tagi Maolunga, gai ia ga gaavadu gi de goe oo mee e lodo ai.

⁵ Hagatuu ina ange oo dagodo gi Tagi Maolunga; hagadonusia hogi ia, gai ia ga hagahai hegau mee nei.

⁶ Ia e hai naa gi sula mai doo heohi bei de maalama o taiao, gai doo heohi gi bei de mmahi o de laa i de madohi lua o de laangi.

⁷ Noho ma gi dee muu, golomagina oo lodo daalia ange ai Tagi Maolunga; aude manavasaa i de hagadaga age o dangada i alaadeu mee e hai, aabe go tangada e sula ana hagatau baubau.

⁸ Koe gi dee lili, gai dilia de bole; Koe gi dee manavasaa, go hiidinga e hano ga duu ange gi de baubau.

⁹ De gau baubau e llilo naa donu, aagai gilaadeu e tali hagalodolodo ange gi Tagi Maolunga e henua naa i de henua.

¹⁰ De gau baubau e moolau naa donu de llilo ga dee maaleva; gai ga saalaa naa donu e goe gilaadeu i olaadeu mommee, gai koe e dee gidee gilaadeu.

¹¹ Aagai gilaadeu e daudonu e henua naa i de henua, ma de malangilangi i de nnoho paba.

¹² De gau baubau e noho e hai baasi ange gi tangada heohi, ma de hagalloa ange olaadeu malaungudu gi de ia;

¹³ aagai de Ia Aamua e gadagada naa i tangada baubau, i hiidinga ia e iloo bolo e dae mai naa donu dono laangi.

¹⁴ De gau baubau e unusi de gadilaasa ma de dada alaadeu mee hholu, e daa ai tangada hagaau aloha ma de duasala, ma de daa gilaadeu e heohi olaadeu dagodo.

¹⁵ Alaadeu gadilaasa e velo naa donu huu gilaadeu, gai alaadeu mee hholu e hadihadi naa.

¹⁶ Momo goloa o tangada heohi e danuaa ange i de lava o de gau baubau soa;

¹⁷ ssauaa o tangada baubau e odi naa, aagai Tagi Maolunga e bale ange gilaadeu e heohi.

¹⁸ Tagi Maolunga e iloo laangi o olaadeu e dee haisala, gai delaadeu boolonga e dagodo ga hano ai.

¹⁹ Gilaadeu e dee dookaa i masavaa hai ngadaa, gai gilaadeu e boobosu i de masavaa o de onge.

²⁰ Aagai de gau baubau e maakau donu; hagadaumee o Tagi Maolunga e bei de mahamaha o de mommee iai helii, gai e moolau donu de llilo bei de useahi.

²¹ Tangada baubau e kave mee a dangada, aagai e dee sui ange, aagai tangada heohi e abodonu ma de ngadi gaavange mee.

²² Gilaadeu a Tagi Maolunga e hagamanuuia e henua naa i de henua, aagai gilaadeu aana e hagamalaia e gaavee gee naa donu.

²³ Tagi Maolunga e hagatau de haiava o tangada, gai ia e bale ange dangada oona e malangilangi ai;

²⁴ gai ga llave naa donu luoono vae, gai ia e dee baguu donu, go hiidinga Tagi Maolunga e daohi dono lima.

²⁵ I mua gai au se dama daane gai iainei au gu madumadua; aagai au tigi gidee donu tangada heohi gi dilia, aabe ana dama gi hulo gi dangidangi i denga gai.

²⁶ Gai gilaadeu e abodonu ange gi dangada ma de ngadi gaavange mee; gai olaadeu hagadiilinga e manuuia.

²⁷ Huli gee i de baubau gai haia tanuaa; gai koe ga maua i de noho i honga de henua ga hano ai.

²⁸ Tagi Maolunga e lodo i de hagamodu muna heohi; gai e dee tili donu ono dangada e hai hegau laa i de muna abodonu. Ia e buibui gilaadeu ga hano ai, aagai hagadiilinga o tangada baubau e llilo naa donu.

²⁹ Tangada heohi e henua naa i de henua, ma de noho ai ga hano ai.

³⁰ Tangada heohi e tala ana muna i de iloo mee, gai ia e tala dagodo o de hagamodu heohi.

³¹ Hainga a dono Maadua e doange i ono lodo; gai ia e dee baguu naa donu.

³² Tangada baubau e mulidagi tangada heohi, ma de ssala de hai e daa ai ia gi magau;

³³ aagai Tagi Maolunga e dee dugu ange naa donu ia gi ssauaa o tangada baubau, aabe e dugu ange gi hagabaubau ina ia i de masavaa e hagamodu ai ono muna.

³⁴ Daalia ange Tagi Maolunga ma de daudali i dono haiava. Gai ia ga hagaamua goe, ga hai goe gi henua i de henua; gai koe e gidee naa de maakau o de gau baubau.

³⁵ Au ne gidee tangada baubau ma de hagamaatagu, e somo danuaa bei manu lau kohu i dono henua donu.

³⁶ Gai au ne ahe mai ange hogi ga gidee bolo ia gu dee maleva; au ne ssala ia, gai au tee gidee ia.

³⁷ Daumada ina tangada e dee haisala, gai diiloo dagodo o tangada heohi; tangada daudonu e soa naa ono hagadiilinga.

³⁸ Aagai de gau baubau e odi naa donu i de maakau, gai hagadiilinga o de gau baubau e maakau donu.

³⁹ De hagaola o de gau heohi e humai i daho Tagi Maolunga; gai go ia delaadeu mommee buibui makaga i de masavaa hai ngadaa.

⁴⁰ Tagi Maolunga e bale ange ma de hagaola gilaadeu; ia e hagaola mai gilaadeu i de gau baubau ma de hagamouli gilaadeu, i hiidinga gilaadeu e hai ia go delaadeu buibui.