Psalm 36 - De Beebaa Dabu

Ange gi tagi o taahili. Se Psalm nii David , tangada hai hegau o Tagi Maolunga

¹ De haisala e basa ange gi lodo o tangada baubau. Gai e deai donu se madagu o de Maadua i ono daha.

² Go hiidinga ia e tuhi donu huu ia, bolo ono baubau e dee gidee donu aabe e hakino gee.

³ Ana muna e tala e baubau, ma de daahanga dangada; ia gu dee hai hegau i de heiangi ma tanuaa.

⁴ Ia e hai donu hogi denga hagatau baubau i honga dono moenga; ia e hagababa ange ia gi dahi haiava e dee danuaa; gai ia e dee kino donu i de baubau.

⁵ Tagi Maolunga, doo aloha e hano loo ga dae gi de langi, doo hai hegau i de mee abodonu e dae age gi denga giliiga.

⁶ Doo heohi e bei denga mounga maolunga; dau hagamodu muna e bei de moana gelo. Tagi Maolunga, koe e tilo danuaa ange dangada ma manu.

⁷ De Maadua, e hagamogomogo mmao doo abodonu! Gai dangada e buibui i lalo de malu o luoo bakau.

⁸ Gilaadeu e gaimee i mee lagolago i doo hale; koe e hai gilaadeu gi unu i dau saalingaa vai iai laa de malangilangi.

⁹ Go koe e daamada mai ai de mouli; gai go doo maalama amaadeu e gidee ai de maalama.

¹⁰ Duudagina de abodonu ange gi gilaadeu e iloo goe, ma de hagaola gilaadeu e heohi olaadeu lodo.

¹¹ Koe gi dee dugua ange de vae o tangada hagamaolunga gi hai baasi mai gi de au, aabe gi dugua ange de lima o tangada baubau gi alualumia hogi au gi hano gee.

¹² Diiloo gilaadeu e haia de baubau gu baakuu ma gu daakodo ai — gilaadeu gu baakuu ma gu dee maua i de hiihidi age ange!