Psalm 34 - De Beebaa Dabu

Se Psalm nii David , i de masavaa aana ne daahanga ai Abimelek bolo ia gu senga, gai de hodooligi laa ga alualu ia gi hano gee mai i ono daha

¹ Au e tuhi Tagi Maolunga i masavaa alodahi; au e duudagi naa donu huu de tuhi ia.

² Dogu hagasaalunga e tala tuhi dagodo o Tagi Maolunga, gai gilaadeu e lodo maolalo e malangilangi naa i delaadeu langona.

³ Hagaamua ina Tagi Maolunga madali au, gidaadeu ga hagaamua dono ingoo!

⁴ Au ne ssala Tagi Maolunga, gai ia ne basa mai gi de au; ia ne hagaola mai au i mee alodahi oogu e madagu ai.

⁵ Gilaadeu e tali hagalodolodo ange gi de ia e malangilangi; gai gilaadeu e dee dookaa naa donu.

⁶ Tangada hagaaloha nei ne dangi, gai Tagi Maolunga gu langona dana dangi, ga hagaola ia mai i ono hai ngadaa alodahi.

⁷ Tangada de langi o Tagi Maolunga e duuli ma de hagaloosi gilaadeu e maatagu i de ia, aama de hagaola gilaadeu.

⁸ Mami ange mage diiloo bolo Tagi Maolunga e danuaa; e manuuia tangada e buibui i ono daha!

⁹ Goodou ono dangada dabu gi maatagu i Tagi Maolunga, i hiidinga gilaadeu e maatagu i de ia e dee duasala donu.

¹⁰ Denga laiono mmahi e duasala ma de hiikai; aagai gilaadeu e saalaa Tagi Maolunga e dee duasala donu i dahi mee daudahi.

¹¹ Agu dama, loomai hagalaangona agu muna; gai au ga agoago adu goodou i de madagu i Tagi Maolunga.

¹² Goai tangada e lodo i de mouli ma de lodo mmao gi mouli ia i laangi lagolago, ma de gidee mee danuaa?

¹³ Koe gi daohia doo alelo mai i de baubau, gai doo ngudu gi dee daalaa hanu muna hhadu.

¹⁴ Koe gi hano gee i de baubau, gai haia tanuaa; ma de ssala gi maua e goe de noho paba.

¹⁵ Tagi Maolunga e dagitilo gilaadeu e heohi, gai luoono dalinga e hagallongo alaadeu dangidangi.

¹⁶ Tagi Maolunga e hai baasi ange gi de gau baubau, ma de hai gi deai selaadeu hagamaanadu i henua i lalo.

¹⁷ Gilaadeu e heohi e tangi, gai Tagi Maolunga e langona delaadeu tangi; ia e hagaola gilaadeu mai i olaadeu hai ngadaa alodahi.

¹⁸ Tagi Maolunga e hagabaa ange gi gilaadeu e daemaha olaadeu lodo, ma de hagaola gilaadeu gu deai selaadeu tali.

¹⁹ Ga lagolago naa donu hai ngadaa o tangada heohi, aagai Tagi Maolunga e hagaola mai ia i mee nei hugadoo.

²⁰ Ia e buibui ono ivi alodahi; gai e deai naa donu se ivi daudahi e hadi.

²¹ De baubau e daa naa ga magau tangada baubau; gai hagadaumee o tangada heohi e hagaduasala naa donu.

²² Tagi Maolunga e hagaola ono dangada hai hegau; gai e deai donu se dangada aana e buibui e hagaduasala.