Psalm 33 - De Beebaa Dabu

¹ Goodou e heohi laa, hevaalogi daahili ange gi Tagi Maolunga; e heohi de daahili olaadeu e heohi ga tuhi.

² Duuhia Tagi Maolunga i de lyre, hagadangidangi ange gi de ia i de harp e madaangahulu laa ono daula!

³ Daahili ange gi de ia i taahili hoou; hagadangidangi ma de hevaalogi i de malangilangi.

⁴ Go hiidinga muna a Tagi Maolunga e heohi gai ni muna abodonu, gai ia e hai hegau i de mee abodonu i ana hegau alodahi.

⁵ Ia e malangilangi i mee heohi ma de hagamodu heohi, gai de abodonu o Tagi Maolunga gu hagadohu henua i lalo alodahi.

⁶ Tagi Maolunga ne tala de muna, gai gu hai de langi, gai mee alodahi iai ne hai i de madangi ne busi mai i lo tono ngudu.

⁷ Ia ne hagabudu denga lausedi bei vai i lo te manu hao vai; gai ia ne dugu de moana gelo i lodo mommee doange.

⁸ Henua i lalo alodahi gi maatagu i Tagi Maolunga, gai dangada alodahi e nnoho ai gi maatagu i de ia!

⁹ Go hiidinga ia ne basa, gai gu hai ga bei; ia ne tala de muna, gai gu hanu mee.

¹⁰ Tagi Maolunga e hai gi dee ssula hagatau a denga huaahenua, ma de hai gi dee haigamaiana hagatau a dangada.

¹¹ Muna bale a Tagi Maolunga e daakodo ga hano ai, ana hagatau ni mee ange gi denga atangada alodahi.

¹² E manuuia de huaahenua go Tagi Maolunga delaadeu Maadua, ma dangada aana gu hili go ono dangada!

¹³ Tagi Maolunga e galo iho i de langi ma e tilo dangada alodahi.

¹⁴ Ia e noho i honga dono nohoanga maolunga ma e tilo ai dangada alodahi e nnoho i henua i lalo;

¹⁵ de ia ne haia lodo o dangada alodahi, go de ia hogi e gidee mee alodahi alaadeu e hai.

¹⁶ De hodooligi e dee ola i hiidinga de soa dono hagabuulinga hebagi; gai taane abo i de hebagi e dee ola i de kona dono mahi.

¹⁷ E deai haigamaiana dau tali ange de hoosa gi hagaola ina goe; gai e dee galemu donu dono mahi, gai ia e dee maua donu i de hagaola dahi.

¹⁸ Aagai Tagi Maolunga e daumada gilaadeu e maatagu i de ia, ma gilaadeu e tali hagalodolodo ange gi dono abodonu,

¹⁹ gai ia e hagaola gilaadeu mai i de magau, ma de tilo gi mouli gilaadeu i de masavaa o de onge.

²⁰ Demaadeu tali hagalodolodo go Tagi Maolunga; go ia demaadeu bale aama demaadeu mee hungihungi.

²¹ Gimaadeu e malangilangi i de ia, i hiidinga gimaadeu e hagadonusia dono ingoo dabu.

²² Tagi Maolunga, abodonu mai gi gimaadeu, gi bei demaadeu tali hagalodolodo adu gi de goe.