Psalm 30 - De Beebaa Dabu

Se Psalm nii David . Se daahili ange gi de hagadabu o de temple

¹ Tagi Maolunga, au e tuhi goe, go hiidinga koe gu hagaola mai au, koe tee dugu ange ogu hagadaumee gi kada i de au.

² Tagi Maolunga dogu Maadua, au ne dangidangi adu koe gi balea mai au, gai koe ne hagaieiangi au.

³ Tagi Maolunga, koe gu hagaahe mai au i de magau; koe ne hai gi dee hano au gi de mommee o de gau maakau.

⁴ Daahili ma de tuhi Tagi Maolunga, goodou ono dangada dabu; gai duuhia dono ingoo dabu.

⁵ Go hiidinga dono lili e dee daulooloa donu, gai dono abodonu e dagodo i taulooloa odaadeu mouli. De dangi e humai i de boo, aagai de malangilangi e humai i taiao.

⁶ De masavaa oogu e duadonu ai, gai au ne hagadaba, “Au e dee maua donu gi ngalungalue”.

⁷ Tagi Maolunga, koe ne hai dogu mounga gi duu gi makaga, i doo abodonu mai gi de au; aagai au ne manavasaa ogu lodo i de masavaa aau ne hagammuni ai luoo mada.

⁸ Tagi Maolunga, au e hagahi adu goe; au e dangi ange gi de Ia Aamua gi abodonu mai gi de au:

⁹ “Ni haigamaiana aha dogu daia ga magau, ma dogu hano gi de mommee o de gau maakau? E maua e de gelegele i de tuhi goe? Gai e maua e de gelegele i de tala dagodo o doo hai hegau i de muna abodonu?

¹⁰ Tagi Maolunga, hagalaangona dagu dangi ma gi abodonu mai gi de au; Tagi Maolunga, balea mai au!”

¹¹ Koe gu hai au gi dee dangi gai gi anu; koe ne aau dogu malo daladala, gai ga hakahu mai au i de malangilangi,

¹² gai au ga tuhi ai goe i taahili, gu dee hagapuni dogu ngudu. Tagi Maolunga dogu Maadua, au e hagaahe adu de abodonu gi de goe ga hano ai.