Psalm 3 - De Beebaa Dabu

Se Psalm nii David , i dono masavaa ne hano ai e mmuni i dana dama go Absalom .

¹ Tagi Maolunga, e dogohia maa ogu hagadaumee! Gai e soa gu nnoho e hai baasi mai gi de au!

² E soa e hagataba i ogu dagodo, “De Maadua e dee hagaola naa donu ia.” Selah

³ Aagai koe, Tagi Maolunga, go de mee hungihungi e duuli ina mai au, koe e hagamahamaha ogu dagodo, ma de hai gi maua e au i de dangage age dogu biho.

⁴ Au e hagahi Tagi Maolunga i de leo laumalie, gai ia ne basa mai gi de au i dono mounga dabu. Selah

⁵ Au ne dagodo ga seni, gai au ne alahage ange hogi, i hiidinga Tagi Maolunga ne hagaloosi au.

⁶ Gai au e dee madagu donu i de semada dangada i delaadeu hagabuni ga duuli luoogu baasi.

⁷ Tagi Maolunga, hidi age! Dogu Maadua, hagaola ina mai au! Koe e hagailiili galaahuu o ogu hagadaumee alodahi; gai hadihadia niho o de gau baubau.

⁸ Tagi Maolunga e maua i de hagaola; gai hagamanuuia ina oo dangada! Selah