Psalm 27 - De Beebaa Dabu

Se Psalm nii David

¹ Go Tagi Maolunga dogu hagamaalama ma dogu hagaola; gai goai ai naa donu oogu e madagu ai? Go Tagi Maolunga de buibui makaga o dogu mouli; gai goai ai naa donu oogu e madagu ai?

² De masavaa o de gau baubau e hebagi mai ai, e daa ai au gi magau, gai ogu hagadaumee ma gilaadeu e kino i de au gu odi i de baakuu ga maakau.

³ Gai ga duuli ina naa donu e dahi hagabuulinga hebagi luoogu baasi, gai au e dee madagu donu, gai ga hebagi mai naa donu gilaadeu gi de au, gai e dahi donu agu tali.

⁴ E dahi mee aagu e dangidangi ange ai gi Tagi Maolunga, gai deenei dagu mee e ssala: go dogu noho i lo te hale o Tagi Maolunga i taulooloa dogu mouli, e daumada ai de mahamaha o Tagi Maolunga ma de ssili i ono daha i lo tono temple.

⁵ Gai ia e buibui naa donu au i dono mommee noho i de masavaa hai ngadaa; ia e hagammuni au i lo tono hale malo, ma de dugu age au i honga de baba maolunga.

⁶ Gai au e kii naa i ogu hagadaumee e duuli ina luoogu baasi; au e hai naa ssigidaumaha i dono hale malo i de malangilangi laumalie ma de daahili ga tuhi Tagi Maolunga.

⁷ Tagi Maolunga, hagalaangona dogu leo i de masavaa aagu e hagahi adu ai goe, koe gi abodonu mai gi de au ma de basa mai gi dagu dangidangi.

⁸ Koe gu hai mai, “Saalaa gi gidee e goodou luoogu mada!” Ogu lodo e hai adu gi de goe, “Tagi Maolunga, au e ssala donu gi gidee e au luoo mada!”

⁹ Koe gi dee hagamuunia luoo mada i de au, koe gi dee alualumia doo dangada hai hegau i doo lili; go koe nogo balea mai au. De Maadua, dogu Ia Hagaola, koe gi dee kino aabe gi hano gee mai i ogu daha.

¹⁰ Gai ga dilia naa donu au i luoogu maadua donu, aagai Tagi Maolunga ga abodonu mai gi de au.

¹¹ Tagi Maolunga, agoagona mai au i doo haiava, dagina adu au i de haiava soe, i hiidinga o ogu hagadaumee.

¹² Koe gi dee dugua ange ogu hagadaumee gi haia mai gi de au olaadeu mee e llodo ai; go hiidinga de gau hadu muna gu hai baasi mai gi de au, gilaadeu gu nnoho e vaivai hai au.

¹³ Au e hagadonusia bolo au e gidee naa donu de abodonu o Tagi Maolunga i dogu mouli i henua i lalo nei!

¹⁴ Koe gi tali hagalodolodo ange gi Tagi Maolunga; koe gi lodo mmahi ma de lo taane, aama de tali ange Tagi Maolunga.