Psalm 22 - De Beebaa Dabu

Ange gi tagi o taahili; e hua i de leo o “Tia o boo taiao”. Se Psalm nii David .

¹ Dogu Maadua, dogu Maadua, gu aha gu tili ai naa goe au? Gu aha gu kona ai naa doo mmao gee ma dau dee hagaola dogu mouli, i dogu masavaa e mmae ai?

² Dogu Maadua, au e dangi i de laangi, aagai koe e dee basa mai; au e dangi i de boo, au e dee maua donu i de hagamabu.

³ Aagai koe e dabu, gai doo nohoanga go de tuhi a de gau Israel.

⁴ Omaadeu maadua madagidagi ne hagadonusia goe; gilaadeu ne hagadonusia goe, gai koe ga hagaola gilaadeu.

⁵ Gilaadeu ne tangi adu gi de goe, gai koe ga hagamouli gilaadeu. Gilaadeu tee dookaa i delaadeu hagadonusia goe.

⁶ Aagai au se ilo e dee se dangada, dangada e kino ma de hagangadi mee au.

⁷ Gilaadeu alodahi e gidee au e doo mee i de au; gilaadeu e hagasomosomo mai olaadeu alelo gi de au, ma de geugeu olaadeu biho:

⁸ “Ia e hagadonu Tagi Maolunga; Tagi Maolunga gi hagaola ina ia. Ia gi hagamouli ina ia, i hiidinga ia e malangilangi i de ia.”

⁹ Aagai go koe ne hagasao ina mai au i de mommee o denga dama; koe ne hai au gi hagadonusia goe i de masavaa oogu e unuunu ai i de gaanuunu o dogu dinana.

¹⁰ Go koe dagu tali mai i dogu haanau; gai go koe dogu Maadua mai i dogu masavaa i lo te dinae ai o dogu dinana.

¹¹ Koe gi dee hagammao gee i de au, go hiidinga de hai ngadaa e baa mai donu gi de au, gai e deai e balea mai au.

¹² Denga kaau lagolago e duuli luoogu baasi; denga kaau mmahi o Bashan e duuli au;

¹³ gilaadeu e hhanga mai olaadeu ngudu gi de au, bei denga laiono alasala e hagangolo laa.

¹⁴ Au gu bei denga vai gu llingi laa, ogu ivi alodahi gu ngaalue; ogu lodo gu bei dagodo o de candle, gu odi laa i de vaivai.

¹⁵ Ogu mahi gu masa bei de gumedi hadu, gai dogu ua gu buni; koe gu danu au i lo te gelegele o de magau.

¹⁶ Denga gaaduu gu duuli luoogu baasi; de hagabuulinga o de gau baubau gu duuli au, gilaadeu gu hagalagolagohia luoogu lima ma luoogu vae.

¹⁷ Ogu ivi gu tuu mai, gai dangada gu haaina ngau.

¹⁸ Gilaadeu gu vaevae ogu malo i olaadeu magavaa, ma de hai tada e tilo ai be goai e gaavee dogu malo.

¹⁹ Aagai koe, Tagi Maolunga, aude hagammao gee i de au! Go koe ogu mahi, hagamoolau balea mai au.

²⁰ Hagamouli ina mai au i de gadilaasa, ma de hagaola dogu mouli hagamogomogo nei mai i denga gaaduu mmahi laa.

²¹ Hagaola ina mai au i de ngudu o de laiono, gai hagamouli ina mai au i hanga o de kaau aada.

²² Au e tala ange naa doo ingoo gi ogu daina; au e tuhi goe madali de hagabuulingaa dangada.

²³ Goodou e maatagu i Tagi Maolunga, duuhia ia! Goodou denga hagadiilinga o Jacob, hagadubu ina ia! Denga aamuli o Israel alodahi, goodou hagadubu ina ia!

²⁴ Go hiidinga ia tee hagangadi mee be tee anga ange gi de hagaduasala ina o tangada; ia tee hagammuni luoono mada i de ia, aagai ne hagallongo dono dangidangi ange i de bale.

²⁵ Au e tuhi goe madali doo hagabuulingaa dangada; gai au e hagassula agu mee gu hagatoo donu ai i madamada olaadeu e maatagu i de goe.

²⁶ De gau hagaau aloha e gaimee naa ga boobosu; gilaadeu e saalaa Tagi Maolunga e tuhi naa ia, gai oodou lodo gi mouli ga hano ai!

²⁷ Henua i lalo alodahi e manadua, ma de daahuli mai gi Tagi Maolunga; gai aamuli alodahi o denga huaahenua e daumaha adu naa gi de goe.

²⁸ I hiidinga go Tagi Maolunga e maolunga; gai go ia e hodooligi i denga huaahenua alodahi.

²⁹ De gau lava alodahi o henua i lalo e daonga naa ma de daumaha; gilaadeu alodahi e maakau laa e ino naa i ono mada i mua — aama tangada e dee maua laa i de hagaola dono mouli.

³⁰ Denga hagadiilinga i muli mai e daumaha ange naa gi de ia; dagodo o de Ia Aamua laa e tala ange naa gi denga atangada e loomai.

³¹ Gilaadeu e tala ange naa gi dangada tigi haanau dagodo o ana hegau heohi alodahi ne hai.