Psalm 20 - De Beebaa Dabu

Ange gi tagi o taahili. Se Psalm nii David

¹ Tagi Maolunga gi balea adu goe i doo duasala; de ingoo o de Maadua o Jacob gi buibuia goe!

² Ia gi gaavadu doo bale mai i de hale dabu ma de gaavadu gi de goe de bale mai i Zion.

³ Gai ia gi dee ngalo au sigidaumaha alodahi, gai gi malangilangi i au sigidaumaha dudu. Selah

⁴ Gai ia gi gaavadu gi de goe doo mee e lodo ai, ma de hagassula au hagatau alodahi.

⁵ Gimaadeu e hevaalogi naa ga malangilangi i doo kii, ma de hagaduu age demaadeu hagailonga i de ingoo o demaadeu Maadua. Tagi Maolunga gi gaavadu mee alodahi oou gu dangidangi ange ai.

⁶ Au gu donu iho bolo Tagi Maolunga e hagaola de ia aana gu hagadabu i de lolo; ia e basa ange gi de ia mai i dono mommee dabu i de langi ma de hagaola ia i dono lima madau mmahi.

⁷ De tali hagalodolodo a hanu go denga hada hebagi, gai hanu go denga hoosa, aagai gimaadeu e hagamaanadu de ingoo o Tagi Maolunga, demaadeu Maadua.

⁸ Gilaadeu e hagamaolalo ina naa ma de baakuu, aagai gimaadeu e hiihidi age naa ga tuu gi makaga.

⁹ Tagi Maolunga, hagaola ina de hodooligi, gai basa mai gi gimaadeu i demaadeu hagaagahi.