Psalm 2 - De Beebaa Dabu

¹ Gu aha gu hagabuni ai denga huaahenua e hai hanu ngadi hagatau, gai dangada gu hagasaele de hai dahi hegau dee haigamaiana?

² Denga hodooligi o henua i lalo gu hagadabena, gai denga dagi gu hagabuni e hai baasi ange ai gi Tagi Maolunga ma de Ia aana gu hagadabu i de lolo, ⌊ma de hagataba,⌋

³ “Gidaadeu ga duuduu alaau daula, ma de tili gee alaau mee e noonooa ai gidaadeu.”

⁴ De ia e noho laa i de langi e gadagada; de Ia Aamua e doo mee naa i gilaadeu.

⁵ Gai ia e hagasee naa gilaadeu i dono lili, ma de hagamaatagu gilaadeu i dono bole, ga hai ange,

⁶ “Au gu hagasula de Hodooligi aagu gu hili i dogu mounga dabu go Zion.”

⁷ Au e hagailoo hainga a Tagi Maolunga gu hagasauaa; ia ne hai mai gi de au, “Go koe dagu Dama Daane, anailaa nei gai go au doo Damana.

⁸ Dangidangi mai gi de au, gai au ga bolo adu gi de goe denga huaahenua, ma de hai goe gi henua i henua i lalo alodahi.

⁹ Koe e dagi naa gilaadeu i togo iron, ma de hai gilaadeu gi bei denga gumedi hadu gu mahaahaa laa ma gu too dagidahi.”

¹⁰ Deenei ai, denga hodooligi, goodou gi heiangi, dagi o henua i lalo, goodou gi kana ange.

¹¹ Daumaha ange gi Tagi Maolunga i de maatagu, gai gi malangilangi ma de bolebole.

¹² Oso ina Tama Daane, kana lili naa ia, gai goodou gu moolau donu de maakau i honga de haiava; go hiidinga ia e moolau donu de lili. E manuuia gilaadeu alodahi e haia ia go delaadeu buibui.