Psalm 16 - De Beebaa Dabu

Se Miktam nii David

¹ Dogu Maadua, buibuia ngau; go koe dogu mommee e buibui ai.

² Au e hai ange gi Tagi Maolunga, “Go koe donu dogu Ia Aamua; e deai sagu mee danuaa daudahi noo e deai goe.”

³ De gau dabu i honga de henua, go gilaadeu e mahamaha, gai au e malangilangi ai.

⁴ Daemaha o olaadeu e daudali ange i denga diinonga e hagalagolago naa. Au e dee hai naa donu alaadeu ssigidaumaha e hai i dodo, aabe e dagudagu ingoo o olaadeu diinonga.

⁵ Tagi Maolunga, go koe dogu duuhanga ma dagu ubu; go koe e hagasauaa ina dogu duuhanga.

⁶ Ogu goinga gu hagatuu i mommee danuaa hugadoo; uaa, dogu boolonga e danuaa mmao.

⁷ Au e hagadegi Tagi Maolunga, de ia e agoagona mai au; ogu lodo e agoago mai au i de boo.

⁸ Au e dugu Tagi Maolunga i ogu mada i mua i masavaa alodahi. Go hiidinga ia i dogu baasi madau, au e dee baguu naa donu.

⁹ Deenei ai, ogu lodo gu malangilangi, gai dogu alelo gu tuhi; gai dogu angaanga gu noho baba hogi.

¹⁰ Go hiidinga koe e dee tili donu au i de mommee o de gau maakau, aabe dugu ange dau ia dabu gi gidee de geelonga laa.

¹¹ Koe e hagaago mai gi iloo e au de haiava o de mouli; doo mommee e noho ai iai de malangilangi laumalie, doo lima madau iai denga mee hagamalangilangi ga hano ai.