Psalm 148 - De Beebaa Dabu

¹ Duuhia Tagi Maolunga! Duuhia Tagi Maolunga mai i de langi; duuhia ia i de mommee maolunga.

² Ono dangada de langi alodahi, goodou duuhia ia; ono hagabuulinga hebagi i de langi, goodou duuhia ia.

³ De laa ma de maasina, duuhia ia; denga heduu maalama alodahi, duuhia ia.

⁴ Lo te langi maolunga, duuhia ia, aama denga vai i lo te langi i lunga!

⁵ Mee nei alodahi gi duuhia de ingoo o Tagi Maolunga, go hiidinga ia ne basa donu huu, gai mee nei gu hanu.

⁶ Ia ne hai gi daakodo mee nei ga hano ai e dee ngado mai; ia gu hagasauaa dahi mee, gai e dee maua naa donu i de sui.

⁷ Duuhia Tagi Maolunga i henua i lalo, goodou denga dragon o lausedi aama denga moana kelo alodahi,

⁸ de ahi ma de uila, ma denga snow ma duudangaa haisi, ma de madangi mmahi e daudali i ana muna;

⁹ denga mounga ma duuduu alodahi, ma manu ssomo iai hua ma denga cedar alodahi;

¹⁰ denga manu lodo henua ma manu haangai, ma manu e tolo i honga de gelegele ma manu llele;

¹¹ denga hodooligi o henua i lalo ma huaadangada alodahi, ma de gau aamua ma dagi alodahi o henua i lalo;

¹² denga dama daane ma damaa hine, ma de gau madumaatua ma denga gauligi.

¹³ Mee nei alodahi gi duuhia de ingoo o Tagi Maolunga, i hiidinga go dono ingoo donu huu e heohi de hagaamua; dono mahamaha e maolunga ange i henua i lalo ma de langi.

¹⁴ Ia gu hagasula age dahi hanga moo ono dangada, de tuhi a ono dangada dabu alodahi, ma de gau Israel, go dangada aana e hagamogomogo. Duuhia Tagi Maolunga!