Psalm 146 - De Beebaa Dabu

¹ Duuhia Tagi Maolunga! Dogu hagasaalunga, duuhia Tagi Maolunga.

² Au e tuhi Tagi Maolunga i dogu mouli; au e daahili tuhi ange gi dogu Maadua i taulooloa dogu mouli.

³ Koe gi dee tali hagalodolodo ange gi denga dagi o de henua, aabe go dama a dangada, go dangada e dee maua i de hagaola goe.

⁴ De masavaa naa huu e odi ai dana manava, gai ia e aahe ange gi de gelegele; de laangi laa gai ana hagatau gu ni ngadi mee.

⁵ E manuuia tangada go de Maadua o Jacob dono bale, gai dana tali hagalodolodo go Tagi Maolunga, dono Maadua,

⁶ go de ia ne haia de langi ma henua i lalo, tai, aama mee alodahi iai. Ia e hai hegau i de muna abodonu ga hano ai.

⁷ Ia e hagamodu muna o olaadeu e vaivai haia i de heohi; ma de gaavange gai a dangada e hiikai. Tagi Maolunga e hagassao mai gilaadeu i lo te hale pono;

⁸ Tagi Maolunga e hai gi kide gilaadeu e dee kide; Tagi Maolunga e hai gi daangage age gilaadeu e ino gi lalo; Tagi Maolunga e aloha i gilaadeu e heohi.

⁹ Tagi Maolunga e dagitilo de gau henua gee; ia e bale ange de hine gu magau dono bodu ma de gauligi gu deai sono damana, aagai e hai gi dee ssula hagatau a de gau baubau.

¹⁰ Tagi Maolunga e hodooligi ga hano ai; Zion, doo Maadua e hodooligi i denga atangada alodahi. Duuhia Tagi Maolunga!