Psalm 140 - De Beebaa Dabu

Ange gi tagi o taahili. Se Psalm nii David

¹ Tagi Maolunga, hagaola ina mai au i de gau baubau; gai buibuia au i de gau alasala,

² go gilaadeu e hagasaelea denga hagatau dee heohi i olaadeu lodo, ma de damadaa de hebagi i masavaa alodahi.

³ Olaadeu alelo e hagamaakau bei de alelo o de labodo hagammau, de mee hagammau i lodo olaadeu malaungudu. Selah

⁴ Tagi Maolunga, buibuia loo au mai i ssauaa o de gau baubau; gai hagaola ina au i de gau alasala e haia hagatau e hagabaguu ai au.

⁵ De gau hagamaolunga gu dugu dahi sele e dada ai au; gilaadeu gu hhola delaadeu galauna i gaogao de haiava e dada ai au. Selah

⁶ Au e hai ange gi Tagi Maolunga, “Go koe donu dogu Maadua.” Tagi Maolunga, hagalaangona agu dangidangi!

⁷ Tagi Maolunga, go koe dogu Ia Aamua, gai go dogu Ia Hagaola mmahi. Koe e buibui dogu biho i de goobai i de laangi e hai ai de hebagi.

⁸ Tagi Maolunga, aude dugua ange gi bei lodo o tangada baubau; aude dugua ange gi ssula ana hagatau baubau! Selah

⁹ Haia hegau baubau a dangada e hai baasi mai gi de au gi aahe ange donu huu gi gilaadeu.

¹⁰ Haia gi malili iho denga maga ahi gi gilaadeu; gai dilia ange gi lo te ahi, ma lodo geelonga iai bela pigi, gilaadeu gu dee maua i de hiihidi age ange.

¹¹ Haia de gau hai samu gi dee noho paba i honga de henua; gai de hai ngadaa gi duu ange gi de gau alasala.

¹² Au e iloo bolo Tagi Maolunga e tala hagadonu dagodo o de gau hagaau aloha, ma de hagamodu olaadeu muna olaadeu e duasala i de heohi.

¹³ Ni muna abodonu, gilaadeu e heohi e tuhi naa doo ingoo; gilaadeu e nnoho naa i mada luoo mada.