Psalm 139 - De Beebaa Dabu

Ange gi tagi o taahili. Se Psalm nii David

¹ Tagi Maolunga, koe gu ssala ma gu iloo ogu dagodo.

² Koe e iloo dogu noho gi lalo ma dogu hidi age; koe e donu ange gi agu maanadu e dee galemu dogu mmao gee.

³ Koe gu gidee danuaa dogu seesee saele aama dogu dagodo iho, gai koe e donu danuaa ange donu gi ogu dagodo alodahi.

⁴ Tagi Maolunga, i mua dagu tala dahi muna, aagai koe gu iloo donu agu muna alodahi.

⁵ Koe e duuli mai ogu dua ma ogu mada i mua, gai koe e dagi au i doo lima.

⁶ De iloo mee nei e gona odi de hagalele mouli mai gi de au; gai e gona odi de maolunga, au e dee maua gi donu ange aagena.

⁷ Go hee naa donu oogu e hano e mmuni ai i doo Hagasaalunga? Gai go hee naa donu oogu e savini e mmuni ai i de goe?

⁸ Noo au e hanage gi de langi, gai koe i kilaa; noo au e hano iho gi de mommee o de gau maakau, gai koe i kilaa.

⁹ Noo au e lele ga hano gee i bakau o taiao, ga hano ga noho i de baasi laa o tai,

¹⁰ aagai koe e dagi donu hogi au i doo lima i kilaa, doo lima madau e poo au gi makaga.

¹¹ Noo au e hagadaba, “Ni muna abodonu, de gohu e haoli naa donu au, gai de maalama i luoogu baasi gu gohu bei de boo,”

¹² gai de gohu e dee maua donu i de hagagohu luoo mada; de boo e maalama naa bei de laangi, i hiidinga de gohu e bei de maalama i oo daha.

¹³ Koe ne hagadau mee i lo togu angaanga; koe ne llanga dogu angaanga i lo te dinae o dogu dinana.

¹⁴ Au e hagaahe adu de abodonu gi de goe i dau hai ne hai ai au; go hiidinga e hagamaatagu ma de hagalele mouli mmao, au hegau e hagalele mouli mmao, gai au e iloo donu de mee nei.

¹⁵ Koe e iloo mee alodahi o dogu angaanga, i de masavaa aau ne hai ai au i de mommee lilo, ma de masavaa oogu ne hagahale ai i mommee kelo hugadoo o henua i lalo;

¹⁶ luoo mada ne gidee mee ne hai ai dogu angaanga. Laangi alodahi gu hagatau mai gi de au gu sisi i dau beebaa, i mua de hagassula dahi mee nei.

¹⁷ De Maadua, au e hagamogomogo mmao au maanadu! Gai e kona mmao de lagolago!

¹⁸ Noo au e dau gilaadeu, gai gilaadeu e lagolago ange i denga gelegele dea. De masavaa oogu e alahage ai, gai au goi madali huu goe.

¹⁹ De Maadua, mee naa koe gi daia gi maakau de gau baubau, gai de gau daa dangada gi hulo gee mai i ogu daha.

²⁰ Gilaadeu e hagabaubau goe i alaadeu muna, oo hagadaumee e hagangadi mee doo ingoo.

²¹ Tagi Maolunga, au e kino i gilaadeu e kino i de goe, ma tee lodo mmao i gilaadeu e hai baasi adu gi de goe!

²² Gai dogu kino i gilaadeu e dee helui donu; gai au e hagabinga bolo gilaadeu ni hagadaumee niiogu.

²³ De Maadua, koe diiloo gi iloo ogu dagodo ma ogu lodo; hagataalea ogu dagodo gi iloo ai dagodo o agu maanadu.

²⁴ Diiloo be e hanu hegau baubau i ogu daha, ma de dagi au i de haiava e deai sono hagaodi.