Psalm 132 - De Beebaa Dabu

Se daahili ange gi de loage ⌊e hulo gi Jerusalem⌋

¹ Tagi Maolunga, manadua David i denga hai ngadaa alodahi gu hai ange gi de ia.

² Ia ne hai dahi hagatoo donu ange gi Tagi Maolunga, ma de hagatoo donu ange gi de Ia Mmahi o Jacob:

³ “Au e dee ulu naa donu i dogu hale, aabe e hano e dagodo i dogu moenga;

⁴ au e dee seni naa donu aabe e mmoe luoogu mada e dama seni iho,

⁵ ga dae ai gi dagu gidee dahi mommee moo Tagi Maolunga, se mommee e noho ai de Ia Mmahi o Jacob.”

⁶ Tilo, gimaadeu ne langona i Ephrathah; gai gimaadeu ne gidee i lo te duu malaelae o Jaar:

⁷ “Gidaadeu ga hulo gi dono mommee e noho ai; gidaadeu ga ino e daumaha i gaogao de mommee e dugu ange aagena luoono vae.”

⁸ Tagi Maolunga, hidi age humai gi doo mommee e hagamabu ai; go koe ma de ngavesi iai doo sauaa.

⁹ Oo dangada haimeedabu gi kahu i de heohi; gai oo dangada dabu gi daahili i delaadeu malangilangi.

¹⁰ Koe gi dee huli gee i de ia aau gu hagadabu i de lolo, i hiidinga o doo dangada hai hegau go David.

¹¹ Tagi Maolunga ne hagatoo donu ange gi David i de muna abodonu, gai ia e dee sui naa donu dana hagatoo donu: “Au e hai naa dahi oo hagadiilinga gi noho i honga doo nohoanga hodooligi.

¹² Noo au dama e daohi dagu hagatoo donu hagaheloongoi, ma muna aagu e agoago ange gi gilaadeu, gai alaadeu dama e dagi naa i doo nohoanga ga hano ai e dee ngado mai.”

¹³ Go hiidinga Tagi Maolunga gu hili Zion; ia ne lodo danuaa i de hai ai dono mommee e noho ai:

¹⁴ “Deenei dogu mommee noho ga hano ai; go kinei oogu e noho ai i hiidinga go de mommee oogu e lodo ai.

¹⁵ Au e hagamanuuia naa de mommee nei i tau gai laumalie; Au e hai naa gi boobosu de gau hagaau aloha i kilaa.

¹⁶ Au e hakahu naa ono dangada haimeedabu i de hagaola, gai ono dangada dabu e daahili naa i delaadeu malangilangi.

¹⁷ Au e hagasula age naa dahi hagadiilinga o David gi hodooligi i kilaa; ma de hagaduu age dahi laama ange gi de ia aagu e hagadabu i de lolo.

¹⁸ Au e hai naa gi dookaa ono hagadaumee, aagai de hau hodooligi i honga dono biho e hagadagadaga age naa.”