Psalm 126 - De Beebaa Dabu

Se daahili ange gi de loage ⌊e hulo gi Jerusalem⌋

¹ De masavaa a Tagi Maolunga ne hagaahe ange ai de manuuia o Zion, gai gimaadeu ne bei dagodo o dangada e midi.

² Gai gimaadeu ne kada i demaadeu malangilangi, ma de hevaalogi ga malangilangi; gai dangada i denga huaahenua ne hagataba, “Tagi Maolunga gu hai dahi hegau hagalele mouli ange gi gilaadeu.”

³ Tagi Maolunga gu hai dahi mee hagalele mouli mai gi gimaadeu, gai gimaadeu gu malangilangi.

⁴ Tagi Maolunga, hagaahea mai demaadeu manuuia, bei dagodo o de vai e hagahonu age laa i Negev!

⁵ Gilaadeu e doo ma de tangi e hagihagi naa i de malangilangi.

⁶ Tangada e sao ga hano i de dangi ma de saabai ana golee e doo ga hano ai, e aahe mai naa donu i de malangilangi, ga saabai mai ana noodangaa grain madali ia.