Psalm 122 - De Beebaa Dabu

Se daahili nii David ange gi de loage ⌊e hulo gi Jerusalem⌋

¹ Au ne malangilangi i delaadeu hai mai gi de au, “Gidaadeu ga hulo gi de hale o Tagi Maolunga.”

² Jerusalem, gimaadeu gu tuu i lodo haitoga o doo buibui.

³ Jerusalem ne hagaduu bei de aduhale e hagaduu laa ma e buni alodahi.

⁴ Deelaa de mommee o denga aamuli e loage aagena, go denga aamuli o Tagi Maolunga, e tuhi ai de ingoo o Tagi Maolunga, bei dagodo o de hainga gu gaavange gi Israel.

⁵ Go kilaa e tuu ai denga nohoanga hagamodu muna, go denga nohoanga hodooligi o de aamuli o David.

⁶ Dalodalo gi dagodo de noho baba i Jerusalem: “Dangada e aaloha i de goe gi nnoho paba.

⁷ De baba gi dagodo i lodo oo buibui, gai gi deai e maatagu i lodo oo hale hagaloosi!”

⁸ Au e hagadaba, “De baba gi dagodo i oo daha,” i hiidinga o ogu daina ma ogu soa.

⁹ Au e ssala naa gi dagodo de nnoho paba i kilaa, i hiidinga o de hale o Tagi Maolunga, taadeu Maadua.