Psalm 114 - De Beebaa Dabu

¹ De masavaa o Israel ne sao ai ga hano gee mai i Egypt, gai dangada o Jacob ne hulo gee mai i daho dangada e pasa i muna henua gee,

² gai Judah ne hai go de mommee dabu o de Maadua, gai Israel go dono mommee e hodooligi ai.

³ Tai ne gidee, gai gu savini ga hano, ssaalingaa vai go Jordan ne ahe dua.

⁴ Denga mounga ne llele saele bei denga ssiibi daane; denga duuduu ne llele saele bei denga ssiibi gauligi.

⁵ Tai, gu aha gu savini ai laa goe ma gu hano? Jordan, gu aha gu ahe dua ai laa goe?

⁶ Denga mounga, gu aha gu llele saele ai naa goodou bei denga ssiibi daane? Denga duuduu, gu aha gu llele saele ai naa goodou bei denga ssiibi gauligi?

⁷ Henua i lalo, bolebole i mada luu mada o de Ia Aamua, ma mada luu mada o de Maadua o Jacob,

⁸ go de ia ne haia de baba ga se mommee e hhao ai vai, gai ne hai de baba ga se saalingaa vai.