Psalm 111 - De Beebaa Dabu

¹ Duuhia Tagi Maolunga! Au e hagaahe ange de abodonu gi Tagi Maolunga i ogu lodo alodahi, i magavaa o de hagabuulinga o olaadeu e heohi.

² Hegau a Tagi Maolunga e maolunga mmao, gai dangada e malangilangi ai e hagamaumau mee nei.

³ Ana hegau e honu i de mahamaha ma de hagadubu, gai dono heohi e dagodo ga hano ai.

⁴ Ia gu hai gi dee ngalo ana hegau hagalele mouli; Tagi Maolunga e degi ma de lodo aloha.

⁵ Ia e gaavange gai a dangada e maatagu i de ia; ia e dee ngalo donu dana hagatoo donu hagaheloongoi.

⁶ Ia gu hagaago ange gi ono dangada ana hegau sauaa, i dana gaavange gi gilaadeu henua o denga huaahenua.

⁷ Ia e hai hegau i de muna abodonu ma de heohi; ana muna alodahi ni muna abodonu,

⁸ gai ne hai gi daakodo ga hano ai e dee ngado mai, gai ne hai hegau i de mee abodonu aama de heohi.

⁹ Ia ne hagaola ono dangada; ia ne hai dana hagatoo donu hagaheloongoi gi dagodo ga hano ai, dono ingoo e dabu gai e hagamaatagu.

¹⁰ De madagu i Tagi Maolunga go taamada o de heiangi; dangada alodahi e seesee i ana hainga e tonu danuaa ange. Dono tuhi gi dee helui ga hano ai!