Psalm 110 - De Beebaa Dabu

Se Psalm nii David

¹ Tagi Maolunga ne hai ange gi dogu Ia Aamua, “Noho i dogu baasi madau, ga dae ai gi dagu hai oo hagadaumee go de mee e dugu ange aagena luoo vae.”

² Tagi Maolunga e haalo ina mai dau laagau hodooligi sauaa i Zion, gai koe e dagi naa i magavaa o oo hagadaumee.

³ Oo dangada e malangilangi naa i de daudali adu i de masavaa o de hebagi, i honga de mounga dabu. Gai oo daane e loomai naa gi oo daha bei dagodo o de mee suungia i taiao.

⁴ Tagi Maolunga gu hagatoo donu gai ia e dee sui naa donu dana hagatoo donu: “Koe se dangada haimeedabu ga hano ai, bei dagodo o Melkizedek.”

⁵ De Ia Aamua e duu i doo baasi madau; ia e hagadee kii naa denga hodooligi i de laangi o dono lili.

⁶ Ia e hagamodu naa muna o denga huaahenua, ga hhao olaadeu mommee gi honu i de gau maakau; ia e daa naa denga dagi o henua i lalo alodahi.

⁷ Ia e unu naa i ssaalingaa vai i gaogao de haiava; deelaa ai, ia gu mmahi age.