Psalm 103 - De Beebaa Dabu

Se Psalm nii David

¹ Dogu hagasaalunga, koe gi duuhia Tagi Maolunga, gai ogu lodo alodahi gi duuhia dono ingoo dabu.

² Dogu hagasaalunga, koe gi duuhia Tagi Maolunga, gai koe gi dee ngalo dono abodonu.

³ Ia e degi adu gi oo baubau alodahi, ma de hagaieiangi oo magi alodahi;

⁴ ia e hagaola doo mouli mai i lo te geelonga o de gau maakau, ma de hagahau goe i dono abodonu ma dono lodo aloha.

⁵ Ia e hagadanuaa goe i denga mee danuaa, deelaa ai, koe e ahe ange ga mmahi bei de igele.

⁶ Tagi Maolunga e hai hegau i de heohi ma de hagamodu muna o dangada alodahi e vaivai haia.

⁷ Ia ne hagaago gi Moses dagodo o ono haiava, gai ne hagaago ange gi de gau Israel dagodo o ana hegau.

⁸ Tagi Maolunga e lodo aloha ma de degi, ia e dee moolau dono lili, gai e abodonu mmao.

⁹ Ia e dee hagabaubau i masavaa alodahi, gai e dee golo age donu dono lili ga hano ai.

¹⁰ Ia e dee hagaduasala gidaadeu gi bei odaadeu haisala, aabe hagao mai gidaadeu gi bei de lagolago odaadeu baubau.

¹¹ Gai dono lodo aloha ange gi gilaadeu e maatagu i de ia, e bei de mmao o de langi mai i henua i lalo.

¹² Gai ia gu hagammao odaadeu haisala mai i gidaadeu bei de mmao o dua mai i dai.

¹³ Gai Tagi Maolunga e lodo aloha ange gi gilaadeu e maatagu i de ia, bei dagodo o tamana e lodo aloha ange laa gi ana dama.

¹⁴ Go hiidinga ia e iloo odaadeu dagodo; ia e manadua bolo gidaadeu ni mama.

¹⁵ Dagodo o tangada, ono laangi e bei laangi o denga helii; ia e bei huaala i lo te duu malaelae;

¹⁶ ga ssau mai naa huu de madangi, gai ia gu ilihia ga dee maleva, gai gu deai donu sono duulanga.

¹⁷ Aagai de abodonu o Tagi Maolunga se mee ange gi gilaadeu e maatagu i de ia, mai i de masavaa e dee ngado mai ga dae ai gi de masavaa e dee ngado mai, gai dono heohi e dohu ange gi denga atangada alodahi,

¹⁸ ma ange gi gilaadeu e daohia dana hagatoo donu hagaheloongoi, ma de hagamaanadu ana hainga.

¹⁹ Tagi Maolunga gu hagaduu dono nohoanga hodooligi i de langi, gai dono nohoanga hodooligi e dagi mee alodahi.

²⁰ Duuhia Tagi Maolunga, goodou ono dangada de langi, go goodou de gau mmahi e haia ono lodo, ma de daudali i ana muna.

²¹ Duuhia Tagi Maolunga, goodou ono hagabuulinga hebagi alodahi i de langi, go goodou ono dangada hai hegau e haia ana ono lodo.

²² Duuhia Tagi Maolunga, ana hegau alodahi, i mommee alodahi oona e hodooligi ai. Duuhia Tagi Maolunga, dogu hagasaalunga!