Psalm 102 - De Beebaa Dabu

Se dalodalo a tangada gu duasala i dono baageaa, gai ia ga dangi ange gi Tagi Maolunga

¹ Tagi Maolunga, hagalaangona dagu dalodalo; hagalaangona dogu dangi adu gi de goe i de bale.

² Koe gi dee hagamuunia luoo mada i de au i de masavaa oogu e duasala ai. Hulia mai doo dalinga gi de au; hagamoolau basa mai gi de au, i de masavaa aagu e hagahi adu ai goe.

³ Dogu mouli e moolau de odi bei dagodo o de useahi, gai ogu ivi e vvela bei dagodo o de ahi.

⁴ Ogu lodo e bei denga helii gu duuduu laa ma gu mmae, au gu ngalo de gaimee.

⁵ Go hiidinga de kona dogu gonogono, au gu ni gili donu huu ma ivi.

⁶ Au gu bei de owl lodo henua; ma de owl i denga mommee gu maoha laa.

⁷ Au gu dee maua i de seni, au gu bei dahi manu lele e noho sogosogo laa i tua de hale.

⁸ Ogu hagadaumee e hagangadi mee au mai i taiao ga boo ai; dangada e hakadanga i de au e hai dogu ingoo gi se muna hagamalaia.

⁹ Agu gai go denga mama o de gelegele, ogu loimada e ssali ange gi lodo agu mee unu,

¹⁰ go hiidinga koe gu bole mmao; koe gu poo au ma gu maga iho gi honga de gelegele.

¹¹ Ogu laangi e mouli ai gu bei de malu o de ahiahi; au gu mmae bei denga helii.

¹² Aagai koe, Tagi Maolunga, e hodooligi ga hano ai; doo ingoo e dee ngalo naa donu i daho denga atangada alodahi.

¹³ Koe e hidi age naa ga lodo aloha ange gi Zion; i hiidinga gu dae doo masavaa e abodonu ange ai, gai gu dae mai de masavaa gu hagailonga laa.

¹⁴ Go hiidinga hadu o Zion ni mee e hagaaloha ange gi oo dangada hai hegau, gai gilaadeu e hinangalosaa i de mama o dono gelegele.

¹⁵ Denga huaahenua e maatagu naa i Tagi Maolunga, denga hodooligi alodahi o henua i lalo e maatagu naa i doo mahamaha.

¹⁶ Go hiidinga Tagi Maolunga e ahe ange naa ga hagaduu age Zion; ia e hagasula mai naa i dono mahamaha.

¹⁷ Ia e basa ange naa gi dalodalo a de gau hagaau aloha, gai ia e dee hagangadi mee alaadeu dangidangi.

¹⁸ Siia muna nei gi daakodo ange gi denga atangada e loomai, gi duuhia ai e dangada e haanau i muli mai Tagi Maolunga.

¹⁹ Ia e galo iho i dono mommee dabu maolunga, Tagi Maolunga e galo iho i de langi ga tilo honga henua i lalo,

²⁰ ga hagallongo de tangi o dangada i lo te hale pono ma de hagaola gilaadeu gu hagamodu e daa gi maakau.

²¹ Gai gilaadeu ga tala ai de ingoo o Tagi Maolunga i Zion, gai gi duuhia ai ia i Jerusalem,

²² i de masavaa o denga huaadangada ma denga hodooligi e hagabuni ai e daumaha ange ai gi Tagi Maolunga.

²³ Ia ne tuu mai ogu mahi i de masavaa oogu e dama daane ai, gai ne hai gi sogoisi laangi oogu e mouli ai.

²⁴ Au ne hagadaba, “Dogu Maadua, koe gi dee gaavee gee au i dogu masavaa e dama daane ai, gai koe e mouli donu i denga atangada alodahi.

²⁵ Koe ne hagadagodo tagelo o henua i lalo i taamada age, gai de langi go koe ne haia i luoo lima.

²⁶ Mee nei e llilo naa donu, aagai koe e noho ga hano ai; gilaadeu e hulo naa ga duai bei de malo. Koe e sui naa gilaadeu bei de malo laa daha, gai gilaadeu e tili gee naa.

²⁷ Aagai koe go tagodo mau donu huu, gai oo ngadau e dee ngado mai donu.

²⁸ Dama a oo dangada hai hegau e nnoho paba naa, gai olaadeu aamuli e dee llilo naa donu mai i mada luoo mada.”