Psalm 10 - De Beebaa Dabu

¹ Tagi Maolunga, gu aha gu hagammao gee ai naa goe? Gu aha gu mmuni ai naa goe i denga masavaa hai ngadaa?

² Tangada lodo maolunga e doolohi tangada hagaau aloha; haia gi aahe ange alaadeu hegau baubau gi gilaadeu.

³ Tangada baubau e tala hagasoenga mee i ono lodo, ia e tuhi tangada nnoo gai e hagangadi mee Tagi Maolunga.

⁴ Tangada baubau e dee ssala de Maadua i dono lodo hagamaolunga; gai de Maadua e dee maleva donu i lodo ana maanadu alodahi.

⁵ Ia e hagadagadaga age i masavaa alodahi; au hagamodu e maolunga mmao, ia e dee gidee donu, ia e hagangadi mee ono hagadaumee alodahi.

⁶ Ia e hagadaba i ono lodo, “Au e dee baguu naa donu; gai au e dee duu ange naa donu gi de hai ngadaa, i denga atangada alodahi.”

⁷ Dono ngudu e honu i muna baubau, ma de hadu muna, aama muna hagamaatagu; gai lalo dono alelo iai de vaivai dagodo ma de baubau.

⁸ Ia e mmuni i gaogao denga aduhale vaaligiligi ma e tali ai; ma de noho e daa gi maakau dangada tigi haisala. Ia e mmuni ma e dagitilo ai ana dangada e daa.

⁹ Ia e mmuni ma de tali bei de laiono i lodo mee muimui; ia e hagadabena e poo tangada hagaaloha, ma de poo tangada hagaaloha i dana dae.

¹⁰ Ana dangada e poo gu lagolagohia, gilaadeu gu baakuu; gilaadeu e dee pau ange i ono mahi.

¹¹ Ia e hagadaba, “De Maadua gu ngalo mee nei; ia gu haoli luoono mada gi dee gidee ai e ia.”

¹² Tagi Maolunga, hidi age; de Maadua, hagaabo ina doo lima; aude ngalo gilaadeu e hagaduasala ina laa.

¹³ Gu aha tangada baubau gu hagangadi mee ai de Maadua i ana muna? Gai gu aha gu hagadaba ai ia i ono lodo, “Ia e dee hagaduasala naa donu au i agu mee gu hai”?

¹⁴ Aagai koe, de Maadua, e gidee de hai ngadaa ma de lili o tangada; koe gi suuia ange mee nei i doo lima. Go koe de tali hagalodolodo a tangada hagaaloha, go koe e balea ange denga gauligi gu deai olaadeu damana.

¹⁵ Haadia de lima o tangada baubau e haia laa de baubau; gai suuia ange ana hegau baubau ga dae ai gi de odi ange.

¹⁶ Tagi Maolunga e hodooligi ga hano ai e dee ngado mai; denga huaahenua e maakau naa ga dee maaleva i dono henua.

¹⁷ Gai koe, Tagi Maolunga, ne hagallongo lodo o olaadeu e vaivai haia; koe e hagammahi ange olaadeu lodo, ma de hagallongo delaadeu tangi,

¹⁸ Go koe e hagamodu ina dagodo o denga gauligi e deai olaadeu damana ma de gau e vaivai haia, gai gi dee hagamadagu ina ai e tangada baubau gilaadeu.