Proverbs 9 - De Beebaa Dabu

De heiangi ma de lodo senga

¹ De heiangi gu hagaduu dono hale; gai ia gu duuduu mai i lo te baba e hidu duludulu moo de hale laa.

² Ia gu daa denga manu e hai ai giidagi, ma de hilo ana uvaini, ia gu hagadabena dana deebele.

³ Ia gu kave ono haahine hai hegau gi tuu i honga mommee maolunga hugadoo o de aduhale, gi hagaagahia ai dangada.

⁴ “Be goai e lodo senga, gai ia gi daa mai gi kinei!” Ia ne hai ange gi dangada e dee tonu,

⁵ “Loomai gaina agu gai, ma de unu agu uvaini gu hilo.

⁶ Dilia oodou llodo ssenga gi mouli ai goodou, gai daudali i de haiava e maua ai goodou gi tonu ange.”

⁷ Be goai e hagaheohi ina tangada doo mee e hagadogaa ina naa, gai be goai e hagaseegina tangada baubau e hagammae ina naa.

⁸ Koe gi dee hagaseegina tangada doo mee, go hiidinga ia e kino naa i de goe, aagai hagaseegina tangada heiangi, gai ia e aloha naa i de goe.

⁹ Agoagona ange tangada heiangi gi kii ange ai dono heiangi; agoagona ange tangada heohi, gi kii ange ai dana mee e iloo.

¹⁰ De madagu i Tagi Maolunga go taamada o de heiangi, gai dau iloo de Ia Dabu laa go de hai ga donu ange goe.

¹¹ Go de heiangi e haia ga daulooloa doo mouli, ma de hai ga lagolago oo ngadau e mouli ai.

¹² Noo koe e heiangi, gai e danuaa adu donu gi de goe, gai noo koe se dangada doo mee, gai go koe donu huu e duasala ai.

¹³ De lodo senga e bei de hine nngana de leo, ia se hine e hagasengalia ngaohie ma teai sono iloo mee.

¹⁴ Ia e noho i ma te abaaba o dono hale, ma honga mommee maolunga hugadoo o de aduhale,

¹⁵ ma e hagahi ai dangada e seesee mai laa kilaa, go dangada e seesee laa donu huu ma e hulo i honga de haiava.

¹⁶ “Be goai naa huu ni dangada llodo senga, gai gilaadeu gi taa mai gi kinei!” Ia e hai ange gi tangada lodo senga,

¹⁷ “Denga vai gaiaa e maimai, gai denga gai e gai hagammuni laa e mammami!”

¹⁸ Aagai gilaadeu e dee iloo donu bolo go kilaa iai de gau maakau, gai dangada i kilaa gu nnoho donu i lo te geelonga o de gau maakau.