Proverbs 8 - De Beebaa Dabu

De hagahi a de heiangi abodonu

¹ E aha, de heiangi e dee oo laa ma e hagaagahi? De donu ange e dee oo mai laa?

² Ia e duu i honga denga mommee maolunga i gaogao de haiava, i de mommee iai hesilihaginga o denga haiava,

³ ma gaogao denga haitoga e ulu ai gi lo te aduhale, ma de oo i gaogao denga haitoga:

⁴ “Au e hagaagahi adu goodou, dangada alodahi, gai agu muna ni muna ange gi dangada alodahi.

⁵ De gau llodo ssenga, haia gi maanetonu goodou, de gau ssenga, haia gi tonu ange goodou.

⁶ Goodou hagalaangona, go hiidinga e hanu agu mee hagamogomogo e tala adu; au e hhanga dogu ngudu e tala de mee heohi.

⁷ Au e tala de muna abodonu i dono ngudu, au e kino i de tala muna baubau.

⁸ Muna alodahi aagu e tala e heohi, e deai donu se muna dee heohi aabe se muna hhadu iai.

⁹ Agu muna alodahi e molomolo ange gi gilaadeu e tonu ange, gai e dee haisala donu ange gi dangada e iloo mee.

¹⁰ Gaavee agu agoago, e dee go denga selevaa; gaavee de heiangi, e dee go denga goolo danuaa.

¹¹ Go hiidinga de heiangi e danuaa ange i denga hadu hagamogomogo, gai e deai donu se mee ange oou e lodo ai e maua de hagahedae ange aagena.

¹² Gai ogu dagodo, de heiangi, au e noho madali de donu ange, gai de iloo mee ma de maanetonu e daakodo i ogu daha.

¹³ De madagu i Tagi Maolunga e kino i de baubau; au e kino i de hagamaolunga ma de lodo maolunga, ma dahulinga baubau aama de hadu muna.

¹⁴ Muna bale ma de heiangi abodonu e daakodo i ogu daha, au e dahi ogu donu ange ma de mmahi.

¹⁵ Go au, de heiangi o denga hodooligi e dagi ai, gai denga dagi e hagatuu ai denga hainga heohi,

¹⁶ go au, de heiangi, a denga dagi ma de gau aamua e dagi ai i de heohi.

¹⁷ Au e aloha i gilaadeu e aaloha i de au, gai gilaadeu e hagammahi e saalaa au e gidee naa e gilaadeu au.

¹⁸ De lava ma de hagadubu e daakodo i ogu daha, ma de lava e dee odi aama de hagadagadaga age.

¹⁹ Ogu hua e danuaa ange i denga goolo ma goolo hagamogomogo, gai hua mai i ogu daha e danuaa ange i selevaa danuaa;

²⁰ au e seesee i de haiava o de heohi, ma haiava o de hagamodu heohi,

²¹ ma de bolo ange de lava gi gilaadeu e aaloha i de au, ma de hhao gi hoohonu olaadeu mommee doange mee.

²² Tagi Maolunga ne hai au i taamada hugadoo o ana hegau, gai go au aana ne hai i mua o ana hegau madagidagi loo.

²³ Madagidagi loo gai au gu dahi donu, ma mai i taamada age, aama mai i mua de dahi o henua i lalo.

²⁴ De masavaa tigi ai se moana gelo, gai au gu dahi donu, de masavaa tigi ai saalingaa vai lagolago iai vai.

²⁵ I mua de hagatuu age o denga mounga i olaadeu mommee, i mua de hanu duuduu, gai au gu haanau;

²⁶ i mua dana hai henua i lalo ma denga duu malaelae i kilaa, aabe go de mama o de gelegele o henua i lalo.

²⁷ Au gu noho donu i de masavaa aana ne hai ai de langi ga hagaduu i dono mommee, ma de masavaa aana ne maaga ai luu baasi o de moana gelo;

²⁸ de masavaa aana ne hai ai denga giliiga i lo te langi, ma de hagatuu ai denga dagelo o tai,

²⁹ ma de masavaa aana ne hagamodu ai de ngaadonga o tai, gi dee hagahaisala ina ai e tai ana muna, ma de masavaa aana ne hagailonga ai denga dagelo o henua i lalo.

³⁰ Gai au, de heiangi, se labagau e noho madali ia. Au ne lodo danuaa i laangi alodahi, ma de malangilangi i ono daha i masavaa alodahi,

³¹ ma de malangilangi i henua i lalo alodahi aana ne hai, ma de lodo danuaa i dangada.

³² Deenei ai, agu dama, goodou hagalaangona agu muna; e manuuia gilaadeu e daudali i ogu haiava.

³³ Nnoho mai hagalaangona agu agoago gi heiangi ai goodou, goodou aude hagangadi mee ina.

³⁴ E manuuia tangada e hagalaangona agu muna, ma de dagitilo i ogu haitoga, ma de tali i ma togu haitoga.

³⁵ Go hiidinga be goai e gidee au e gidee de mouli, gai Tagi Maolunga e abodonu ange gi de ia.

³⁶ Aagai be goai e dee gidee au e hagaduasala donu huu ia, gai gilaadeu alodahi e kino i de au, e llodo donu i de magau.”