Proverbs 6 - De Beebaa Dabu

Hagakana ange gi gilaadeu e llodo ssenga

¹ Dagu dama, noo koe gu hagatoo donu e hagao muli a tangada e baa adu gi de goe, noo koe gu hagatoo donu i dau luuluu de lima o dahi dangada;

² noo koe gu noodia i au muna gu tala, ma de boogia i hiidinga o au muna gu tala,

³ dagu dama, deenei dau mee e hai gi ola ai goe, go hiidinga koe gu doo ange gi lo te lima o dahi dangada: hannoo hagamaolalo ina goe, ma de dangidangi ange gi de ia!

⁴ Aude seni donu, aabe gi damaa mmoe luoo mada.

⁵ Hagaola ina goe, bei dagodo o dahi dia e ola mai laa i tangada dili manu, ma de manu lele e ola mai laa i ssele a tangada dili manu.

⁶ Tangada vaiduu, hannoo gi daho de loa, diiloo ai alaadeu hegau, gi heiangi ai goe!

⁷ Denga loa e deai donu se dangada e daalaa ange alaadeu mee e hai, e deai se dangada e diiloo ange gilaadeu, aabe se dagi,

⁸ gai gilaadeu e hagadabena delaadeu hagamouli i de masavaa mahanahana, ma de hagabudu alaadeu gai i de masavaa o de hagihagi.

⁹ Tangada vaiduu, dee hee maa taulooloa doo dagodo donu huu i kinaa? Go aahee maa oou e alahage ai?

¹⁰ Koe e hagadaba, “Au e damaa mmoe luoogu mada, e damaa seni ange, au e damaa hagapogo luoogu lima e hagamabu iho” —

¹¹ de hagaau aloha e duu adu naa gi de goe bei tangada gaiaa, gai tuasala e bei taane gu hagauda ono goloa hebagi.

¹² Tangada e deai ono haigamaiana, se dangada baubau, e hagadaga saele ma e tala denga muna hhadu;

¹³ ia e hai gi dabadaba luoono mada, ma de sisi ange i luoono vae, aama de sisi ange i ono madannia;

¹⁴ ia e hagasaele denga hagatau baubau i ono lodo, ma de hagadee heloongoi magavaa o dangada i masavaa alodahi.

¹⁵ Deenei ai, de hai ngadaa e daa hagalele naa donu de duu ange gi de ia; gai e moolau naa donu dono hai ngadaa, gai ia e dee ieiangi naa donu.

¹⁶ E ono mee o Tagi Maolunga e kino ai, gai e hidu mee hakino gee i ono daha:

¹⁷ go luu mada hagamaolunga, ma de alelo hadu muna, ma lima e daia dangada tigi haisala,

¹⁸ ma de lodo e haia denga hagatau baubau, ma luu vae e moolau laa de hano e hai de baubau,

¹⁹ ma tangada tala hagadonu hadu muna, aama tangada e haia ga dee heloongoi denga hai daina.

De hagakana ange o de gau dagodo haisala

²⁰ Dagu dama, daohia hainga a doo damana, gai koe gi dee dilia agoago a doo dinana.

²¹ Daohia mee nei i oo lodo i masavaa alodahi, gai daulia ange mee nei gi doo ua.

²² Agoago nei e dagi naa goe i doo seesee, ma de dagitilo goe i doo masavaa e seni ai, gai e madaangudu adu naa gi de goe i doo alahage.

²³ Go hiidinga de muna nei e bei de laama, gai de agoago nei se mee hagamaalama; gai doo hagaheohi ina e hagaabo ange goe gi de haiava o de mouli,

²⁴ gai e buibui ai goe i de hine dagodo haisala, ma de ngudu maimai o de hine dau bodu hai be se manu.

²⁵ Aude lodo ange gi dono mahamaha, aabe gi dugua ange ia gi hagasengalia goe i dana hagadabadaba adu luoono mada,

²⁶ gai de hagaoanga o de hine hai be se manu se duudangaa pelaoaa donu huu, gai de hine dau bodu e dagitilo e vaivai hai doo mouli.

²⁷ E maua e tangada i de hhao ange de ahi gi ono hadahada, gai ono malo e dee vvela?

²⁸ Aabe e maua e tangada i de seesee i honga denga maga ahi ula, gai luoono vae e dee vvela?

²⁹ Gai e bei ai hogi taane e hano gi daho de bodu o dahi daane gee, taane e dagodo haisala ma de hine laa e hagaduasala donu.

³⁰ Dangada e dee hagabaubau tangada gaiaa noo ia e gaiaa i dono hiigai,

³¹ aagai noo ia gu boogia mai, gai ia e hagao donu gi hidu hanonga e kii ange ai, e dee galemu donu noo ia e gaavange ono goloa alodahi e hagao ai.

³² Taane dagodo haisala se dangada donu senga, gai be goai e haia hegau nei e daa donu huu ia ga magau.

³³ Taane bee nei e hagailiilia naa ma de hagangadi mee ina, gai dono hagadogaa e dee haihai naa donu ga hagadeai;

³⁴ gai de maagoda e hai ga kona de lili o taane dau bodu, gai ia e dee degi ange naa donu, i de laangi aana e sui ange ai de baubau.

³⁵ Ia e dee lodo donu e kave dahi hagaoanga; ia e dee kave naa donu au ngadi gaavange lagolago.