Proverbs 5 - De Beebaa Dabu

Hagakana ange gi dee dagodo haisala

¹ Dagu dama, anga mai gaavee dogu heiangi, gai huli mai hagalaangona dogu iloo mee;

² gi maanetonu ai goe, gai au muna e tala gi dagodo ai de iloo mee.

³ De ngudu o de hine dagodo haisala e maimai bei denga madaua hooni, gai ana muna e segesege ange i lolo;

⁴ aagai dono hagaodi e hagammau bei de mee mmala, gai e kangi bei de gadilaasa baasi lua.

⁵ De hine bee nei e seesee i de haiava o de magau, gai luoono vae e dagi ange goe gi de mommee o de gau maakau.

⁶ Ia e dee maanadu donu dagodo o de haiava o de mouli; ono haiava e pigo, aagai ia e dee iloo donu.

⁷ Agu dama, goodou hagalaangona agu muna, gai goodou gi dee dilia agu muna e tala adu.

⁸ Koe gi hagammao gee i de hine bee nei, aude hano donu gi hagabaa ange gi de mommee iai dono hale;

⁹ ana vakaa ga gaavange e goe oo mahi gi hanu dangada gee, gai oo ngadau e doe gu gaavange gi dangada e vaivai haia dangada;

¹⁰ gai hanu dangada gee gu hagadanuaa i oo mahi, gai oo mee ne hai hegau ange aagena gu gaavange gi dahi dangada gee;

¹¹ de hagaodi o doo mouli gai koe e gonogono naa, i de masavaa o doo angaanga e baageaa ai;

¹² koe ne hagadaba, “Au ne kino mmao i dogu agoagona, gai au ne hagangadi mee dogu haelenga!

¹³ Au tee hagallongo ange gi muna a ogu dangada agoago, gai tee anga ange gi muna ne tala mai gi de au.

¹⁴ Ne momo ange donu huu au gu hagadogaa ina i magavaa o de hagabuulingaa dangada.”

¹⁵ Unumia donu huu vai mai i lo taau vai hoda, ma vai e ssali mai i dau vai geli donu.

¹⁶ Aude dugua ange ono vai gi ssali gi hulo gi hanu mommee gee, aabe go honga haiava o dangada!

¹⁷ Aagai go koe donu huu e unu ai, aude dugua ange hanu dangada gee gi unu ai madali goe.

¹⁸ Koe gu manuuia i dau vai, gai koe gi malangilangi i de hine oou ne hai bodu ange naa aagena i de masavaa oou e dama daane ai.

¹⁹ Ia e bei dahi dia hahine mahamaha, gai se dia hahine e tilo danuaa. Luoono gaanuunu gi hagamalangilangi ina goe i masavaa alodahi, gai koe gi lodo mmao i dono aloha i masavaa alodahi.

²⁰ Dagu dama, gu aha gu dugu ange ai goe de hine dagodo haisala gi gaavee oo lodo? Gai gu aha gu hanange ai goe gi de bodu o dahi daane gee?

²¹ Tagi Maolunga e gidee danuaa hegau a tangada, gai ia e tilo dagodo o ana hegau alodahi e hai.

²² Hegau baubau a tangada baubau e gidee mai naa donu, gai ia e noodia ma e makaga i ono haisala.

²³ Ia e magau naa i hiidinga ia tee agoagona, gai dono lodo senga laumalie e dagi gee ia.