Proverbs 4 - De Beebaa Dabu

Haigamaiana o de heiangi

¹ Agu dama, goodou hagalaangona agoago a doodou damana, gai kana ange hagalaangona, gi tonu ange goodou aagena;

² go hiidinga au e gaavadu gi goodou agoago heohi, goodou aude dilia agu agoago.

³ De masavaa oogu e gauligi ai i de hale o dogu damana, gai dogu angaanga goi mmodo huu, gai go tama hagamogomogo a dogu dinana,

⁴ gai dogu damana ne agoago mai au, ga hai mai, “Daohia agu muna i oo lodo, doange ina agu muna e tala adu, gi mouli ai goe.

⁵ Haia gi heiangi goe, haia gi dahi oo donu ange; aude ngalo agu muna, aabe gi hano gee i agu muna.

⁶ Aude dilia de heiangi, gai de heiangi ga buibui ai goe; koe gi lodo mmao i de mee nei, gai ia ga hagaloosi adu ai goe.

⁷ Deenei taamada o de heiangi, deenei ai, haia gi heiangi goe, gai be ni aha ange naa aau e kave, gai haia gi dahi oo donu ange.

⁸ Hagamogomogo ina de heiangi, gai ia ga hagaamua ai goe; daohia de heiangi, gai koe ga kave de hagadubu.

⁹ De heiangi e hagamahamaha naa goe, bei de hau i honga doo biho, gai e gaavadu gi de goe de hau mahamaha.”

¹⁰ Dagu dama, hagalaangona ma de daudali i agu muna, gi lagolago ai oo ngadau e mouli ai.

¹¹ Au gu agoago adu goe i de heiangi, gai ne dagi goe i denga haiava heohi.

¹² Gai ga seesee naa huu goe, gai luoo vae e dee llave, gai ga savini naa goe, gai koe e dee baguu.

¹³ Daohia agu agoago, aude dilia donu, gai diiloo ange gi danuaa, go hiidinga deenei doo mouli.

¹⁴ Aude duu i honga de haiava o de gau baubau, gai gi dee seesee i de haiava baubau.

¹⁵ Hagaui gee i de haiava nei; aude seesee ai donu, gai huli gee mai ai, ga hagasoe i doo haiava.

¹⁶ Go hiidinga gilaadeu e dee sseni naa donu ga dae ai gi delaadeu hai de baubau; gilaadeu e dee maua gi sseni ga dae ai gi delaadeu hai dahi dangada ga haisala.

¹⁷ Go hiidinga de baubau e bei alaadeu mee e gai, gai de vaivai hai dangada go alaadeu mee e unu.

¹⁸ Aagai de haiava o tangada heohi e bei de maalama o taiao, e hagadagadaga ange laa de maalama ga dae ai gi de duu donu o de laa.

¹⁹ Hegau a de gau baubau e bei de gohu boo dangodango, gilaadeu e dee iloo donu be se aha ne hagalaavea olaadeu vae ga baakuu ai laa gilaadeu.

²⁰ Dagu dama, hagalaangona agu muna e tala adu; huli mai luoo dalinga mage hagalaangona agu muna.

²¹ Aude dilia dahi agu muna daudahi, gai daohia mee nei i oo lodo;

²² gai mee nei go de mouli ange gi gilaadeu e saalaa ga gidee, gai e hagaieiangi olaadeu angaanga alodahi.

²³ Gai de mee e hagamogomogo ange i mee alodahi, go de dagitilo dagodo oo lodo, go hiidinga go kilaa iai mee o de mouli.

²⁴ Dilia gee de ngudu hadu muna, gai daohia doo ngudu gi dee daalaa muna hakino gee.

²⁵ Daumada ina donu huu oo mada i mua, daumada ina oo mada i mua ma de hagasoe i doo haiava.

²⁶ Hagassoea denga haiava oou e seesee ai, gi dee haisala ai doo hai e seesee ai.

²⁷ Aude daa gi de baasi madau be go de baasi masui, gai huli gee i de baubau.