Proverbs 31 - De Beebaa Dabu

Muna a de hodooligi go Lemuel

¹ Muna a de hodooligi go Lemuel — go muna hagadaemaha a dono dinana ne agoago ange ai ia:

² “Dagu dama, tama aagu ne haanau, tama o dagu hagatoo donu,

³ aude moumou ina oo mahi i daho denga haahine dagodo haisala, ma oo mahi i daho olaadeu e hagahaisala ina denga hodooligi.

⁴ Lemuel, e dee ni mee ange gi denga hodooligi — e dee heohi de unu a denga hodooligi denga uvaini, aabe go de unu a denga dagi mee mmahi,

⁵ kana unu gilaadeu ga ssenga ga ngalo denga hainga gu hagasauaa, gai gilaadeu ga kave gee de heohi o dangada alodahi e duasala.

⁶ Gaavange mee mmahi gi dangada gu dai maakau, ma uvaini gi gilaadeu e daemaha olaadeu lodo;

⁷ dugua ange gilaadeu gi unu gi ngalo ai e gilaadeu delaadeu hagaau aloha, gilaadeu gu dee manadua delaadeu duasala.

⁸ Basa mage balea ange gilaadeu e dee maua i de pasa, ma de bale ange heohi o dangada alodahi gu deai selaadeu tali.

⁹ Basa mage hagamodu ina muna i de heohi, daalaa heohi o de gau hagaau aloha ma de duasala.”

Dagodo o de hine e madagu i de Maadua

¹⁰ Goai e maua i de gidee dahi hahine dahulinga danuaa? De hine bee nei e hagao ngadaa ange i denga ruby.

¹¹ Dono bodu e dahi ana tali ange gi de ia, gai e deai donu sana mee daudahi e deai.

¹² De hine bee nei e hai hegau danuaa ange gi dono bodu, e dee hai ange de baubau gi de ia, i taulooloa o dono mouli.

¹³ Ia e ssala mee e hai i huluhulu o denga manu ma flax, ma de hagammahi ga hai hegau i luoono lima.

¹⁴ Ia e bei dagodo o denga vaga hagao mee, ia e gaamai ana gai i de mommee mmao.

¹⁵ Ia e oho age i de masavaa goi gohu ai; ia e hai gai a dangada i dono hale, ma duuhanga o ono haahine hai hegau.

¹⁶ Ia e tilo gi danuaa de alahenua i mua dana hagao; gai e hai ana mee gu mau ga doo ai dahi veelengaa grape.

¹⁷ Ia se hine mmahi i de hai hegau; gai luoono lima e mmahi i de hai ana hegau.

¹⁸ Ia e iloo bolo ana goloa e hagao e danuaa, gai dana laama e dee diinei donu i de boo.

¹⁹ Ia e poo de laagau e hilo ai ana deleisi, ma de hai ana deleisi ga llanga ai denga malo.

²⁰ Ia e abodonu ange gi de gau hagaau aloha, ma de ngadi gaavange mee gi gilaadeu e duasala.

²¹ Ia e dee manavasaa donu i dono huaabodu i de masavaa hagamagalili, go hiidinga gilaadeu alodahi e kahu i malo mmea.

²² Ia e dui malo e haoli ai moenga; ono malo e hai i linen danuaa gai e purple.

²³ Dono bodu se daane hagadubu i de haitoga o de aduhale, madali denga daane maatua o de henua.

²⁴ De hine nei e hai denga malo linen ma e hagao; ia e hagao ange mee noonooa ungaalodo gi de gau hagao mee.

²⁵ Ia e mmahi gai se hine hagadubu i daho dangada, gai ia e malangilangi i dana maanadu denga masavaa e loomai.

²⁶ Ia e tala ana muna i de heiangi, gai de hainga e dagina ana muna go de abodonu.

²⁷ Ia e tilo danuaa ange mee alodahi i dono hale, gai ia e dee se hine vaiduu.

²⁸ Ana dama e tuu age ga tala hagadanuaa ono dagodo; dono bodu e tuhi hogi ia, ga hai ange,

²⁹ “E soa haahine e hai hegau danuaa mmao, aagai koe e dubu ange i gilaadeu alodahi.”

³⁰ De tuhi a dangada e daahanga tangada, gai de mahamaha e moolau de lilo; aagai de hine e madagu laa i Tagi Maolunga e duuhia naa.

³¹ Hagadubu ina de hine nei i hua o ana hegau, gai duuhia ia i denga haitoga o de aduhale, i hiidinga o ana hegau.