Proverbs 3 - De Beebaa Dabu

Hanu haigamaiana o de heiangi

¹ Dagu dama, aude ngalo agu agoago, aagai daohia agu hainga i oo lodo;

² gi lagolago ai oo laangi ma ngadau e mouli ai gai e hai naa ga laumalie doo noho baba.

³ De abodonu ma de hai hegau i de mee abodonu e dee hulo gee naa donu i oo daha, gai daulia luu mee nei i doo ua, ma de sisi i oo lodo.

⁴ Gai de Maadua ma dangada e hagadubu naa goe ga hagaamua doo ingoo.

⁵ Hagadonusia Tagi Maolunga i oo lodo alodahi, aude lango ange gi mee oou e donu ange aagena;

⁶ koe gi manadua ia i mee alodahi aau e hai, gai ia ga dagi ai goe i denga haiava heohi.

⁷ Aude hagadaba bolo koe e heiangi, gai koe gi madagu i Tagi Maolunga, ma de kino i de baubau.

⁸ De mee nei e hai naa ga ieiangi goe, ma de hagammahi lo too angaanga.

⁹ Hagadubu ina Tagi Maolunga i doo lava, ma denga huamanu e hagihagi i taamada i lodo au veelenga alodahi;

¹⁰ gai gi hoohonu ai lodo o oo mommee doange, gai au mommee hhao uvaini e hoohonu naa ga malingilingi.

¹¹ Dagu dama, aude hagangadi mee ina de haele a Tagi Maolunga goe, aabe gi kino i de hagallongo dana hagasee goe;

¹² go hiidinga Tagi Maolunga e hagasee tangada oona e aloha ai laa, bei dagodo hegau a tamana ange gi tama oona e malangilangi ai laa.

¹³ E manuuia tangada gu heiangi, ma tangada gu dahi ono donu ange,

¹⁴ go hiidinga de mee e maua ai e danuaa ange i selevaa, gai e haigamaiana ange i denga goolo.

¹⁵ De heiangi e hagamogomogo ange i denga ruby, gai e deai ange donu se mee oou e lodo ai, e maua i de hagahedae ange aagena.

¹⁶ De mouli daulooloa e daohi i dono lima madau, gai de lava ma de hagadubu i dono lima masui.

¹⁷ Ono haiava e hagamalangilangi, gai ono haiava alodahi iai de nnoho paba.

¹⁸ De heiangi e bei de manu somo o de mouli, ange gi dangada alodahi e gaavee; gai gilaadeu e daohia de heiangi nei, e manuuia donu.

¹⁹ Tagi Maolunga ne hagaduu henua i lalo i dono heiangi, gai ne hagatuu mee i lo te langi i dono donu ange.

²⁰ Dono iloo mee ne vvae denga moana kelo, gai ne hai gi hano iho de mee suungia i lodo hagausinga.

²¹ Dagu dama, aude dilia de heiangi ma de maanetonu; aude ngalo luu mee nei;

²² luu mee nei e gaavadu naa gi de goe de mouli, gai e bei de mee dau e hagamahamaha ai laa doo ua.

²³ Gai koe ga seesee ai naa i de baba, gai koe e dee baguu ai naa donu;

²⁴ de masavaa oou e dagodo ai gi lalo, gai koe e dee madagu; de masavaa oou e dagodo iho ai e seni, gai koe e seni danuaa naa.

²⁵ Aude madagu i de mee hagamaatagu e humai daa hagalele laa, be go de hagaduasala e daia laa de gau baubau,

²⁶ go hiidinga Tagi Maolunga go dau tali hagalodolodo, ia e tilo naa gi dee doo ange doo vae gi lo te ssele.

²⁷ Aude daohia de mee danuaa i gilaadeu e heohi dau bale ange, noo e dahi oo ssauaa e hai ai de hegau nei.

²⁸ Aude hai ange gi tangada e baa adu gi de goe, “Hannoo ga aahe mai ange ai, gai au ga gaavadu ai gi de goe daiao” — gai e dahi donu mee i oo daha.

²⁹ Aude haia dahi hagatau baubau e hai baasi ange ai gi tangada e baa adu gi de goe; go de ia e dahi ana tali i de goe i dono noho i oo gaogao.

³⁰ Aude hagadaumee ange gi dahi dangada i teai hiidinga, gai tigi ai se baubau aana ne hai adu gi de goe.

³¹ Aude lodo gaiaa ange gi tangada alasala, aabe gi ago ange i ana hegau,

³² go hiidinga Tagi Maolunga e kino i tangada vaivai dagodo, aagai ia tala ange ono lodo gi tangada heohi.

³³ Tagi Maolunga e hagamalaia de hale o tangada baubau, aagai e hagamanuuia de mommee noho o tangada heohi.

³⁴ Ia e doo mee i gilaadeu e doo mee i de ia, aagai e abodonu ange gi gilaadeu e lodo maolalo.

³⁵ Tangada heiangi e hagadubulia naa, aagai de gau llodo ssenga e dookaa naa.