Proverbs 29 - De Beebaa Dabu

¹ Be goai e hagaseegina i hanonga lagolago, gai e hagamakaga ono lodo, e daa hagalele naa donu dono lagohia — gai ia e dee ieiangi naa donu.

² De masavaa olaadeu e heohi e hagadagadaga age ai, gai dangada e malangilangi; aagai de masavaa naa huu o tangada baubau e dagi ai, gai dangada e duasala.

³ Tangada e lodo laa de heiangi e hagamalangilangi dono damana, aagai tangada e hai soa ange laa gi denga haahine hai be se manu e moumou donu huu dono lava.

⁴ Go de mee heohi a dahi hodooligi e maua ai i de hai gi nnoho paba de henua, aagai de hodooligi e nnoo ange gi denga ngadi gaavange hagasenga e oha de henua.

⁵ Be goai e hagasegesege ina ange tangada e bei tangada e dugua laa dahi galauna gi llave ai luoono vae.

⁶ Tangada baubau e noodia donu huu i ono haisala, aagai tangada heohi e daahili ma de malangilangi.

⁷ Tangada heohi e iloo de heohi o de gau hagaau aloha; aagai tangada baubau e dee maanadu de mee nei.

⁸ De gau doo mee e bei tangada e duungia laa de aduhale, aagai de gau heiangi e hai ga sili de lili o tangada.

⁹ Noo tangada heiangi e gaavange dahi dangada lodo senga gi de hainga, gai tangada lodo senga e lili naa donu huu ma de gadagada, gai e dee tuu naa donu de hagalongaa.

¹⁰ De gau daa dangada e kino i tangada e hai hegau i de heohi, gai gilaadeu e ssala tangada heohi e daa gi magau.

¹¹ Tangada lodo senga e hagasula mai donu dono lili, aagai tangada heiangi e golomagi ono lodo.

¹² Noo tagi e daudali i denga muna hhadu, gai dagi alodahi i ono lalo e hulo naa ga ni dangada baubau.

¹³ Tangada hagaau aloha ma tangada e vaivai haia dangada e dagodo daudahi donu huu i de mee nei: go Tagi Maolunga e haia olaau ganomada e tilo ai.

¹⁴ Noo de hodooligi e hagamodu muna o de gau hagaau aloha i de heohi, gai dono nohoanga hodooligi e hagaduu naa ga makaga.

¹⁵ De laagau haele e hai ga heiangi tangada, aagai de gauligi e dee haelea laa e hagadogaa dono dinana.

¹⁶ De masavaa naa huu o de gau baubau e hagadaga age ai, gai de baubau e hagadaga age naa hogi; aagai de gau heohi e gidee naa delaadeu hagadee kii ina.

¹⁷ Haelea dau dama, gai ia ga hai ai gi noho baba goe; ia e hai naa goe ga malangilangi.

¹⁸ Ga deai naa huu midi hagaago ange, gai dangada gu hai donu huu olaadeu lodo, aagai e manuuia tangada e daohia de hainga.

¹⁹ Denga muna e dee maua i de hagaheohi tangada hai hegau, go hiidinga e dee galemu naa donu dono donu ange, aagai ia e dee anga ange naa donu aagena.

²⁰ E kii ange de dahi adaadeu tali ange gi tangada lodo senga i tangada e hagamoolau laa ga basa.

²¹ Tangada e hakide ina ange dono dangada hai hegau mai i dono gauligi, gai ia e gaamai naa de hai ngadaa i muli mai.

²² Tangada lillili e hai ga dee heloongoi magavaa o dangada, gai tangada e lili i masavaa alodahi e dee modu de haisala.

²³ De lodo maolunga o tangada e hai ga maolalo ia, aagai tangada lodo maolalo e kave naa de hagadubu.

²⁴ Tangada e hagabuni ange gi tangada gaiaa e kino i dono mouli donu; ia gu hai dahi hagatoo donu, gai ia gu dee maua i de tala hagadonu.

²⁵ Doo madagu i tangada e nnoa goe bei ssele, aagai be goai e hagadonusia Tagi Maolunga e ola.

²⁶ E soa dangada e ssala de abodonu mai i daho dahi dagi, aagai de hagamodu muna heohi se mee mai i daho Tagi Maolunga.

²⁷ Tangada heohi e kino i tangada baubau, gai tangada baubau e kino i tangada e haia de mee heohi.