Proverbs 28 - De Beebaa Dabu

¹ Tangada baubau e savini naa ga hano, e dee galemu donu teai dangada e dolohia ia, aagai tangada heohi e lo taane bei de laiono.

² De masavaa naa huu o de henua e haisala ai, gai gu soa dangada e dagina, aagai tangada e donu ange ma de iloo mee e hai ga nnoho paba dangada.

³ Tagi e vaivai haia laa de gau hagaau aloha, e bei de langi maadolu e haia laa ga deai gai.

⁴ Gilaadeu e dee daudali laa i de hainga e tuhi de gau baubau, gai dangada e daudali laa i de hainga e hai baasi ange gi gilaadeu.

⁵ De gau baubau e dee tonu ange gi dagodo o de hagamodu heohi, aagai gilaadeu e saalaa Tagi Maolunga e honu delaadeu tonu ange.

⁶ Tangada hagaau aloha e hai hegau laa i de mee heohi e danuaa ange i tangada lava e dee hai hegau laa i de mee abodonu.

⁷ Tangada e daudali laa i de hainga se dama heiangi, aagai tangada e hagabuni ange gi de gau aagai e hagadogaa dono damana.

⁸ Tangada e haia dangada gi hagao dahi mee laa honga mee aama mee gaavange gi kii ange ai dono lava, e hagabudu naa donu huu mee laa ga dugu ange gi dahi dangada gee, go tangada e ngadi gaavange mee gi de gau hagaau aloha.

⁹ Noo tangada e dee hagallongo ange gi de hainga, gai ana dalodalo e hakino gee donu hogi.

¹⁰ Tangada e dagina ange tangada heohi gi de baubau, e doo ange naa gi lo tana sele; aagai tangada e dee haisala e kave naa de boolonga danuaa.

¹¹ Tangada lava e maanadu bolo ia se dangada heiangi, aagai tangada hagaau aloha e donu ange laa, e iloo dagodo o tangada lava.

¹² De masavaa naa huu o de gau heohi e kii ai, gai dangada gu malangilangi; aagai de masavaa o de gau baubau e ssula ai, gai dangada e hulo ga mmuni.

¹³ Tangada e hagamuunia ono haisala e dee hagadagadaga ange donu, aagai tangada e daalaa ma de tili ono haisala, de Maadua e abodonu ange naa gi de ia.

¹⁴ Tangada e madagu laa i Tagi Maolunga i masavaa alodahi e manuuia donu, aagai tangada e hagamakaga ina ono lodo e duu ange naa gi de hai ngadaa.

¹⁵ Tangada baubau e dagina laa de gau hagaaloha e bei de laiono e hagangolo laa aabe go de bea e hebagi ange laa gi tangada.

¹⁶ Tagi e dee donu laa e vaivai hai dangada; aagai tangada e kino laa i goloa gaiaa e daulooloa naa dono mouli.

¹⁷ Tangada e dee baba laa ono lodo i dana daa tangada ga magau, e silivaahea saele naa ga dae ai gi dono magau; gai e deai naa donu se dangada e balea ange.

¹⁸ Tangada e hai hegau i de mee heohi e ola donu, aagai tangada e dee heohi ana hegau, e moolau naa donu dono duu ange gi de hai ngadaa.

¹⁹ Tangada e hagabalabala ina dono alahenua, e lagolago ana gai, aagai tangada e ngadi hano saele laa e hagaau aloha naa donu.

²⁰ Tangada e hai hegau laa i de mee abodonu e manuuia, aagai tangada e hagamoolau laa e hai gi lava ia, e dee haihai naa donu ga dee hagaduasala.

²¹ De hilihili dangada e dee se hegau danuaa; aagai tangada e hai naa donu de mee dee heohi i hiidinga o de ngadi gaavange hagasenga.

²² Tangada gailalopoli e kona de lodo gi moolau dono lava, gai ia e dee iloo bolo ia e duu ange naa donu gi tuasala.

²³ Tangada e hagaheohi ina laa dahi dangada, e laumalie de abodonu aana e kave i muli mai, ia e kii ange i tangada e hagasegesege ina ange dangada.

²⁴ Tangada e gaiaa ina laa mee a dono damana aabe go dono dinana, ga hagadaba, “Au tigi haisala donu” — se soa donu niio tangada e oohaa ina mee.

²⁵ Tangada nnoo hagamau mee e hai naa ga dee heloongoi dangada, aagai tangada e hagadonusia Tagi Maolunga e hagadagadaga age naa.

²⁶ Tangada e hagadonu laa donu huu ia se dangada lodo senga; aagai tangada e hai hegau i de heiangi e ola donu.

²⁷ Tangada e abodonu ange laa gi de gau hagaau aloha e dee duasala naa donu; aagai tangada e dee anga ange gi gilaadeu, e duu ange naa gi denga hagamalaia lagolago.

²⁸ De masavaa naa huu o de gau baubau e sula ai ga mmahi, gai dangada ga mmuni; aagai de masavaa naa huu olaadeu e maakau ai, gai gilaadeu e heohi gu hagadagadaga age.