Proverbs 27 - De Beebaa Dabu

¹ Aude basa hagasoenga i dagodo o daiao, go hiidinga koe e dee iloo be ni aha e hai i dahi laangi.

² Dugua ange dahi dangada gee gi duuhia goe, e dee go koe e duuhia goe; dahi dangada gee gi duuhia goe, e dee go koe.

³ De hadu e daemaha, gai denga gelegele ni mee daemaha, aagai de mee bole o tangada lodo senga e daemaha ange i luu mee nei ngaadahi.

⁴ De lili e kona de alasala, gai de bole e kii ange donu de baubau, aagai goai e maua i de hai baasi ange gi de maagoda?

⁵ E danuaa ange doo hano gi daho tangada ga hagasee ai ia i de hagammuni doo aloha i de ia.

⁶ Koe e maua i de hagadonu doo soa i dana hagasee goe, aagai tangada e kino i de goe e lagolago ana hanonga e oso ai goe.

⁷ Tangada gu bosu laa e kino i hooni, aagai denga mee mmala e mami danuaa ange gi tangada e hiigai.

⁸ Tangada e hano gee i dono hale, e bei de manu lele e tili laa dono hoohanga.

⁹ Lolo ma vai hagamanongi e hagamalangilangi tangada, gai de manongi o ssoa o tangada go ana muna bale danuaa.

¹⁰ Aude dilia doo soa ma ssoa o doo damana; aude hano gi de hale o doo daina i de masavaa oou e hai ngadaa ai. E danuaa ange doo hano gi daho tangada e baa adu laa gi de goe i doo hano gi doo daina e mmao gee laa.

¹¹ Dagu dama, koe gi heiangi, gi malangilangi ai au; gi maua ai e au i de basa ange gi tangada e hagangadi mee ina au.

¹² Tangada maanetonu e mmuni i de masavaa aana e gidee ai de mee hagamanavasaa, gai tangada lodo senga e hagasoe donu huu, ga hagaduasala ai donu huu ia.

¹³ Gaavee de malo o tangada gu hagatoo donu e hagao muli a dahi dangada gee, gai daohia de malo laa e hagadonu ai dana hagao muli a dahi dangada henua gee.

¹⁴ Tangada e oo laa ga hagaboo ange gi tangada e baa ange gi de ia i boo taiao, dana hagaboo e hagabinga bolo se hagamalaia.

¹⁵ De hine dau bodu lodo hagadaumee ma denga madaua e too iho laa i de laangi bala langi se dagodo daudahi;

¹⁶ gai de daohi ia gi dee hagadaumee e bei dau hagatale de daohi de madangi, aabe go de daohi gi dee ssali lolo i lo too lima madau.

¹⁷ Denga iron e hakaa denga iron, gai dahi dangada e hakaa tangada ange laa.

¹⁸ Tangada e bolia ange de fig e gaimee naa i ono hua, gai tangada e diiloo ange dono dangada aamua e hagadubulia naa.

¹⁹ Tangada e gidee danuaa dono ada i lodo vai, gai maanadu a tangada e hagaago mai ono dagodo.

²⁰ De mommee o de gau maakau ma Abaddon e dee maua donu gi hoohonu, gai luu ganomada o tangada e dee maua hogi gi lava ana mee e tilo.

²¹ De anibada se mee ange gi denga selevaa, gai de ahi mmahi se mee ange gi denga goolo, aagai dangada e gidee danuaa dagodo o tangada i de masavaa alaadeu e tuhi ai ia.

²² Ga dugidugia naa donu e goe tangada lodo senga i lo te mommee tugi, i magavaa o denga grain, gai e dee maua donu i de aau gee de lodo senga i ono daha.

²³ Haia gi iloo e goe dagodo o dau hagabuulingaa ssiibi, ma de hagaloosi gi danuaa au manu haangai;

²⁴ go hiidinga de lava e dee maua gi dagodo ga hano ai, gai dahi nohoanga hodooligi e dee maua hogi gi dagodo i denga atangada alodahi.

²⁵ De masavaa naa huu e aau ai denga helii mmasa, gai denga helii hoou gu matili age, gai denga helii i honga denga duuduu e hagabudu naa;

²⁶ huluhulu o denga ssiibi e hai ai oo malo, gai denga guudi e maua i de hagao e hagao ai dahi alahenua.

²⁷ Koe e lagolago naa au vai uu guudi e haangai ai dangada i doo hale, ma de gaimee ai oo haahine hai hegau.