Proverbs 26 - De Beebaa Dabu

¹ De hagadubu e dee heohi ange gi tangada lodo senga, e bei de loiho o denga snow i de masavaa mahanahana aabe go de pala de langi i de masavaa o de hagihagi.

² De hagamalaia gai teai hiidinga e dee duu adu naa donu gi de goe, bei de sparrow e ngadi gabagaba laa, aabe go de swallow e ngadi lele saele laa.

³ Taula e hagailiili ai se mee ange gi de hoosa, de uga nnoa se mee ange gi de ngudu o dahi donkey, gai de laagau se mee ange gi dua o de gau llodo ssenga.

⁴ Aude basa ange gi tangada lodo senga gi bei dagodo o dono lodo senga, koe kana bei ono dagodo.

⁵ Basa ange gi tangada lodo senga gi bei dagodo o dono senga, gi dee maanadu ai ia bolo ia e heiangi.

⁶ De hai gi hano dahi dangada lodo senga gi hagailoo ina ana muna, e bei donu de duuduu luu vae o dahi dangada, aabe go dana hagahai ngadaa donu huu ia.

⁷ Muna hagasengasenga a tangada lodo senga, e bei luu vae o tangada balagelage e ngadi tagi laa.

⁸ Tangada e hagadubu laa tangada lodo senga, e bei de nnoa ange dahi hadu gi lo te buada.

⁹ Muna hagasengasenga a de gau llodo senga, e bei de mee duiduia i lo te lima o dahi dangada senga.

¹⁰ Dau hagahai hegau tangada lodo senga, aabe go dahi dangada gu dae mai laa gi oo daha, e bei tangada e dilia de mee hholu e hagalagolagohia ai dangada.

¹¹ Tangada lodo senga e ahe ange ga hai ana hegau senga, e bei de gaaduu e ahe ange laa ga gai ono hagalueia.

¹² Tangada lodo senga e kii ange de dahi ana tali i tangada e maanadu bolo ia e heiangi.

¹³ Tangada vaiduu e hagadaba, “E dahi laiono i honga de haiava, e dahi laiono e hano saele laa honga denga haiava!”

¹⁴ Tangada vaiduu e hulihuli saele i honga dono moenga, bei de abaaba e hulihuli saele laa gai e pigi ange gi ono mee hagamakaga.

¹⁵ Tangada vaiduu e velo ange dono lima gi lo te gumedi, gai e dee maua donu e ia i de hagaahe age gi dono ngudu.

¹⁶ Tangada vaiduu e maanadu bolo ia e heiangi ange i e dogohidu dangada maanetonu i alaadeu muna e tala.

¹⁷ Tangada e badai laa i de masavaa o dangada e hagadaumee ai, e bei tangada e daangia laa luu dalinga o de gaaduu.

¹⁸ Tangada hai mee senga e dilia laa denga dao ula ma dao o de mee hholu hagamaakau laa,

¹⁹ se dangada e daahanga ina tangada e baa ange gi de ia, ga hai ange, “Au ne hakadanga adu donu huu!”

²⁰ De ahi e made naa noo e deai lahhie; noo gu deai dangada e hai samu, gai gu dee hagadaumee hogi dangada.

²¹ Denga dalaa ubu e hai ai de maga ahi, gai lahhie e dahu ai de ahi; e bei ai hogi, tangada lodo hagadaumee e hai ga hebagi dangada.

²² Muna a tangada hai samu e bei denga amuamu gai mammami; gai e hulo naa ga ulu gi lodo o tangada.

²³ De hagasegesege ange tangada i au muna gai oo lodo e dee se muna abodonu, e bei de gumedi ne hai laa i gelegele, ma gu hagamalamalama laa daha.

²⁴ Tangada e hagammuni dagodo o ono lodo i ana muna e tala, aagai ono lodo e dagodo ai de hadu muna.

²⁵ Ga basa hagamalangilangi naa donu ia, gai koe aude hagadonusia ana muna, i hiidinga ono lodo e honu i maanadu hakino gee.

²⁶ Ia e hagammuni dono kino i de hadu muna, aagai dangada soa e gidee naa ana hegau baubau.

²⁷ Tangada e gelia laa dahi geelinga e doo ange naa gi ono lodo, gai tangada e hagadigelia dahi hadu, de hadu laa e ahe mai naa ga dau i de ia.

²⁸ Tangada e daalaa muna hhadu e kino i dangada aana e hagabaubau, gai tangada e hagasegesege ina ange dangada e hai naa ga hai ngadaa dangada.