Proverbs 25 - De Beebaa Dabu

Hanu muna hagasengasenga a Solomon

¹ Aanei ange hanu muna hagasengasenga a Solomon, a denga daane hai hegau o de hodooligi go Hezekiah i Judah ne langa.

² De mahamaha o de Maadua go dana hai gi dee iloo dahi mee, gai de mahamaha o denga hodooligi go delaadeu ssala gi iloo dahi mee.

³ De maolunga o de langi ma de gelo o henua i lalo, e bei dagodo maanadu i lodo o de hodooligi e dee maua gi iloo.

⁴ Aaua gee denga mee baubau mai i denga selevaa, gai de labagau o denga selevaa gu maua i de hagaduu ai dahi mee danuaa,

⁵ aaua gee de gau baubau mai i daho de hodooligi, gai dono nohoanga hodooligi e hagaduu naa ga makaga i de mee heohi.

⁶ Aude hagamaolunga ina goe i mada i mua o de hodooligi, aabe gi hagahedaea ange goe gi de gau maolunga;

⁷ e danuaa ange noo ia e hai adu, “Gage mai gi kinei,” i dana hagamaolalo goe i mada i mua o dahi dangada aamua. Noo koe gu gidee dahi mee,

⁸ gai koe aude hagamoolau gi gaavange gi de hainga, gai ni aha naa aau e hai i muli mai, noo dahi dangada e hai goe ga dogaa?

⁹ Noo gooluu ma tangada e baa adu gi de goe gu dee heloongoi, gai koe gi dee daalaa ange ana muna gi dahi dangada gee,

¹⁰ kana langona e dahi au muna gai ia ga hagadogaa goe, gai au hegau baubau e dee maua naa donu gi ngalo.

¹¹ Muna e tala laa i de masavaa heohi e bei denga aabele goolo e hagatau laa i honga gaini selevaa.

¹² Tangada heiangi e hagaseegina laa tangada e lodo laa e hagallongo ana muna, e bei de hakai goolo aabe se mee hagalaagii goolo.

¹³ Tangada adi muna e hai hegau laa i de mee abodonu, e bei denga snow e hagamaluulu ina laa i de masavaa o de hagihagi: ia e hagamaamaane lodo o ono dangada aamua ne haia ia gi hano.

¹⁴ Tangada e tala tuhi ana mee ngadi gaavange tigi gaavange laa, e bei denga giliiga ma de madangi e deai laa se langi e pala iho ai.

¹⁵ De golomagi lodo e maua i de sui lodo o dahi dagi, gai muna maamaane e maua i de hhadi de ivi makaga.

¹⁶ Noo koe e gidee hanu hooni, gai koe hagabaulia donu huu au mee e gai, kana hagalueia goe i de gona odi de lagolago au mee e gai.

¹⁷ Aude hagamau doo hano gi de hale o tangada e baa adu gi de goe, kana goso ia i de goe, gai ia gu kino i de goe.

¹⁸ Tangada tala hagadonu hadu muna e hagabaubau ina laa dahi dangada, e bei de laagau hebagi be go de gadilaasa, aabe go tao kangi o de mee hholu.

¹⁹ Dau hagadonu tangada e dee hai hegau i de mee abodonu i de masavaa hai ngadaa, e bei dagodo o de niho bobo aabe go de vae gu maaguluaa laa.

²⁰ Tangada e daahili ange gi tangada e daemaha ono lodo, e bei tangada e hagaui ina malo i de laangi hagamagalili, aabe go denga vinegar e llingi ange laa gi honga soda.

²¹ Noo doo hagadaumee gu hiigai, gai koe haangai ina ange ia; noo ia gu hieunu, gai koe hagaunumia ange ia.

²² Gai koe e hagabudubudu ange naa denga maga ahi gi honga dono biho, gai Tagi Maolunga e hagao adu naa goe.

²³ De madangi mai i ngaiho e gaamai de langi; gai tangada hai samu e hai dangada ga llili.

²⁴ E danuaa ange de noho o dahi i tua dahi hale, i dono noho i lo te hale madali dahi hahine lodo hagadaumee.

²⁵ Denga longo danuaa mai i dahi henua mmao, e bei denga vai maluulu ange gi tangada gu hieunu laa.

²⁶ Tangada heohi gu hagallongo ange laa e tangada baubau, e bei dahi saalingaa vai gu belabela ina laa aabe go de vai geli gu hakino laa.

²⁷ E dee danuaa de gai gi lagolago hooni, e dee danuaa hogi ssala doo hagadubu i daho tangada.

²⁸ Tangada e dee maua laa i de golomagi ono lodo, e bei de aduhale gu maoha laa dono buibui.