Proverbs 24 - De Beebaa Dabu

¹ Aude lodo gaiaa ange gi de gau baubau, aabe gi lodo e hagabuni ange gi gilaadeu;

² go hiidinga gilaadeu e hagatau de hai e vaivai hai ai dangada, ma de pasa i delaadeu hai e hagahai ngadaa ai dangada.

³ De hale e hagaduu i de heiangi, gai e hagaduu ga makaga i de donu ange;

⁴ gai go de iloo mee e hhao ai ga hoohonu ono aabi i denga goloa hagamogomogo ma de mahamaha.

⁵ Tangada heiangi e mmahi mmao, gai tangada iloo mee e hai ga hagadaga ange de mmahi.

⁶ Denga muna bale danuaa e maua i de dagi goe i de hebagi, gai doo kii e hidi mai i de soa o oo dangada hagasaele.

⁷ De heiangi e hano laa honga de biho o tangada lodo senga; gai ia e dee maua i de hhanga dono ngudu i de haitoga o de aduhale.

⁸ Tangada e haia denga hagatau baubau e hagabinga bolo se dangada e vaivai dagodo.

⁹ Hagatau a tangada lodo senga e haisala, gai dangada e kino i tangada doo mee.

¹⁰ Noo koe e dee lodo mmahi i de masavaa hai ngadaa, gai e sogoisi oo mahi.

¹¹ Hagaola ina gilaadeu gu kave laa e daa gi maakau; gai daohia gilaadeu e hulo laa gi de mommee olaadeu e daa ai gi maakau.

¹² Noo koe e hagadaba, “Tilo, gimaadeu tee iloo donu,” e aha, de ia e hagahidi ina lodo o dangada e dee iloo e ia de mee nei? E aha, de ia e hagaloosia adu doo mouli e dee iloo e ia de mee nei? Gai ia e dee hagao ange naa dahi ma dahi gi bei dagodo o ana hegau?

¹³ Dagu dama, gaina denga hooni, go hiidinga e danuaa, denga hooni hoou mai i de mommee hai hooni e maimai.

¹⁴ Koe gi iloo hogi bolo de heiangi e bei de mee maimai ange gi doo hagasaalunga; noo koe gu maua de heiangi, gai e dahi au tali ange gi masavaa e humai, gai dau tali e dee tuu naa donu.

¹⁵ Tangada baubau, aude noho gi daalia e hai baasi ange gi tangada heohi, aude vaivai haia dono mommee noho;

¹⁶ gai ga baguu naa donu tangada heohi i e hidu hanonga, gai ia e hidi age ange naa, aagai de gau baubau e maakau naa i de masavaa hai ngadaa.

¹⁷ Aude malangilangi i de masavaa o doo hagadaumee e baguu ai, gai koe gi dee lodo danuaa i masavaa oona e dai baguu ai;

¹⁸ kana gidee naa e Tagi Maolunga, gai ia gu dee malangilangi, gai ia gu dee hagaduasala ia.

¹⁹ Aude manavasaa i hiidinga o olaadeu e haia de baubau, aude lodo gaiaa ange gi de gau baubau;

²⁰ go hiidinga tangada baubau e dee daulooloa donu dono mouli, gai de laama a tangada baubau e moolau naa donu de diinei.

²¹ Dagu dama, koe gi madagu i Tagi Maolunga ma de hodooligi, gai koe gi dee hagabuni ange gi de gau hagamaanege,

²² go hiidinga e daa hagalele naa donu delaau oha mee nei, gai goai e iloo be se hai ngadaa bee hee alaau e gaamai?

Hanu muna heiangi

²³ Aanei ange hanu muna a de gau heiangi. E dee se mee danuaa de hilihili dangada i de masavaa e hagamodu ai muna.

²⁴ Be goai e hai ange gi tangada gu haisala, “Koe e dee haisala” — dangada e hagamalaia naa ia, gai denga huaahenua e kino naa i de ia.

²⁵ Aagai dangada e hagaseegina tangada gu haisala, e laumalie naa delaadeu manuuia.

²⁶ Tangada e daalaa adu de muna abodonu e bei de oso de usu o tangada.

²⁷ Haia gi lava au hegau i duaahaho ma de hagadabena au veelenga; muli mai, gai koe ga hagaduu doo hale.

²⁸ Aude hagabaubau ina tangada e baa adu gi de goe i teai hiidinga, aabe gi daahanga ina dangada i au muna.

²⁹ Aude hagadaba, “Au e hai ange naa gi de ia ana mee ne hai mai gi de au; au e sui ange naa donu ana mee ne hai.”

³⁰ Au ne hano laa gaogao de veelenga a tangada vaiduu, ma de veelengaa grape a tangada senga;

³¹ gai tilo, gu ssomo ai denga manu daladala ma manu dabeo, gai de bae i luu baasi gu maoha.

³² De masavaa aagu ne gidee ai ma de maanadu dagodo o de mee nei, gai au gu ago dahi mee i agu mee ne gidee:

³³ de damaa seni iho, ma de damaa mmoe luoo mada, ma de damaa ulunga ange gi luoo lima e hagamabu ai,

³⁴ gai de hagaau aloha e duu adu naa gi de goe bei tangada gaiaa, gai tuasala bei taane gu hagauda ono goloa hebagi.