Proverbs 21 - De Beebaa Dabu

¹ Lodo o de hodooligi e bei ssaalingaa vai i lo te lima o Tagi Maolunga; gai ia e hai gi hano be go hee aana e lodo e hai gi hano aagena.

² Tangada e maua i de maanadu bolo ono haiava e heohi, aagai Tagi Maolunga e hagahidi dagodo o ono lodo.

³ De hai hegau i de heohi ma de hagamodu heohi e kii ange de hagamogomogo i daho Tagi Maolunga i ssigidaumaha.

⁴ Luu mada hagamaolunga ma de lodo maolunga go de laama a tangada baubau, gai e haisala donu.

⁵ Hagatau a tangada hai mee e hai ga lagolago ana mee, aagai dangada alodahi e hagamoolau e hagaau aloha naa.

⁶ Denga goloa hagamogomogo e maua i de hadu muna e bei mama o denga vai e moolau laa de lilo, gai e bei ssele o de magau.

⁷ De alasala o de gau baubau e daa naa gilaadeu ga maakau, i hiidinga gilaadeu e dee llodo e hai de mee heohi.

⁸ De haiava o tangada gu haisala e bigo, aagai hegau a tangada gilimalali e heohi.

⁹ E danuaa ange de noho o tangada i tua de hale, i dono noho i lo te hale madali dahi hahine e lodo hagadaumee.

¹⁰ Tangada baubau e lodo mmao i de baubau, gai ia e dee abodonu ange gi tangada e baa ange gi de ia.

¹¹ Noo gu hagaduasala tangada doo mee, gai tangada lodo senga gu kii ange de heiangi; gai de masavaa naa huu e agoago ange ai tangada heiangi, gai ia gu iloo mee.

¹² De Ia Heohi e iloo dagodo o de hale o tangada baubau, gai ia e hagaduasala naa de gau baubau.

¹³ Be goai e bonodia luoono dalinga, i de masavaa o de gau hagaau aloha e tangi ai, gai e deai naa hogi dangada e balea ange ia, i de masavaa oona e dangi ai.

¹⁴ De gaavange dahi mee ngadi gaavange hagammuni, e hagasili de lili o tangada, gai de mee ngadi gaavange hagasenga hai hagammuni, e hagasili de bole laumalie.

¹⁵ De masavaa naa huu e sula ai de hagamodu heohi, gai tangada heohi gu malangilangi, aagai e hai ga maatagu gilaadeu e haia de baubau.

¹⁶ Tangada e dee maanetonu laa, e dau naa madali de hagabuulinga o de gau maakau.

¹⁷ Tangada e lodo laa e hagamalangilangi ia, e hagaau aloha naa, gai be goai e nnoo ange laa gi uvaini ma lolo, e dee maua donu gi lava.

¹⁸ Tangada baubau go de mee hagaola o tangada heohi, gai tangada e dee hai laa hegau i de mee abodonu, e sui tangada heohi.

¹⁹ E danuaa ange de noho o tangada i de vao, i dono noho madali de hine lodo hagadaumee ma de nanu.

²⁰ Lo te hale o tangada heiangi iai goloa hagamogomogo ma lolo, aagai tangada lodo senga e hai moumou ana mee.

²¹ Tangada e hai hegau laa i de mee heohi ma de abodonu, e gidee naa e ia de mouli, ma de heohi aama de hagadubu.

²² Tangada heiangi e hebagi ange naa gi dahi aduhale o denga daane mmahi, gai ia e oha naa de mommee buibui makaga alaadeu e tali ange laa aagena.

²³ Tangada e daohia dono ngudu ma ana muna e tala, e hagaola dono mouli i de hai ngadaa.

²⁴ Tangada basa hagasoenga se dangada lodo maolunga — dono ingoo go de lodo maolunga, gai ia e hai hegau hagamaolunga.

²⁵ Mee o tangada vaiduu e lodo ai, e daa donu ia gi magau, go hiidinga ia e dee lodo e hai hegau.

²⁶ De laangi alodahi gai ia e hagadaga ange dono lodo ange gi mee, aagai tangada heohi e abodonu i de gaavange mee.

²⁷ Ssigidaumaha a tangada baubau se mee hakino gee; gai e kii ange donu de hakino gee noo se mee ne hai i de maanadu baubau!

²⁸ Tangada tala hagadonu hadu muna e magau naa donu, aagai muna a tangada e hagalaangona e daakodo ga hano ai.

²⁹ Tangada baubau e hagassee, aagai tangada e heohi laa, e hagasaele dono hai e seesee ai.

³⁰ E deai donu se heiangi, e deai donu se donu ange, gai e deai hogi se hagatau e maua i de hai baasi ange gi Tagi Maolunga.

³¹ De hoosa e hagadabena ange gi de hebagi, aagai go Tagi Maolunga e dugu ina ange gi kii dahi.