Proverbs 20 - De Beebaa Dabu

¹ De uvaini e bei tangada doo mee, gai mee mmahi e hai ga hagalongaa tangada; be goai e dugua ange de mee nei gi dagina ia e dee heiangi.

² De bole o de hodooligi e bei de hagangolo o de laiono; tangada e haia ia ga lili e daa donu ga magau.

³ Tangada e hagaui gee i de hebagi se dangada hagadubu, aagai de gau lodo ssenga alodahi e dee modu de hagadaumee.

⁴ Tangada vaiduu e dee hagabalabala dana veelenga i de masavaa hai veelenga, gai e deai naa donu ana huamanu e gide i de masavaa o de hagihagi.

⁵ Hagatau i lodo o tangada e bei de vai gelo, aagai tangada e donu ange laa e hai gi ssula age mee nei.

⁶ E soa dangada e maanadu bolo gilaadeu ni dangada e abodonu, aagai e hai ngadaa donu i de gidee dahi dangada e hai hegau i de mee abodonu.

⁷ Tangada heohi e hai hegau laa i de mee abodonu, e hai naa ga manuuia denga dama e loomai i ono dua.

⁸ De hodooligi e noho i honga dono nohoanga e hagamodu ai muna, e hili denga mee baubau alodahi i de masavaa aana e gidee ai.

⁹ Goai e maua i de hagadaba, “Au e gilimalali ogu lodo; au e gilimalali, au e dee haisala donu”?

¹⁰ Denga mee hagahidi ma mee haide hadu muna, ni mee niio Tagi Maolunga e kino ai.

¹¹ Ngalungalue a tamaa gauligi e hagaago mai ono dagodo, be ana hegau e gilimalali ma de heohi.

¹² Luu dalinga e langona laa ma luu ganomada e gidee — go Tagi Maolunga ne haia luu mee nei ngaadahi.

¹³ Aude lodo i de seni, koe kana hagaau aloha, gai koe ala mage hai hegau gi lagolago ai au gai.

¹⁴ Tangada hagao mee e hagadaba, “E dee danuaa, e dee danuaa,” gai ia e hano ga tala tuhi dagodo o de goloa aana ne hagao laa.

¹⁵ E hanu goolo, gai e lagolago hadu hagamogomogo, aagai muna a tangada iloo mee e kii ange de hagao ngadaa i mee nei.

¹⁶ Gaavee de malo o tangada gu hagatoo donu e hagao muli a dahi dangada gee, gai daohia de malo laa e hagadonu ai dana hagao muli a dahi dangada henua gee.

¹⁷ Denga gai e maua laa i de hadu muna e mammami, aagai muli mai naa huu gai lo tono ngudu gu honu i denga giligili.

¹⁸ Au hagatau e ssula naa i dau kave muna bale, ma taaginga danuaa i mua doo hano e hebagi.

¹⁹ Tangada hai samu e hagangadi mee de tali a tangada; deelaa ai, aude hagabuni ange gi tangada vava de ngudu.

²⁰ Tangada e basa baubau i dono damana aabe go dono dinana, dono mouli e bei naa de laama e diinei laa i lo te gohu boo dangodango.

²¹ Mee a tangada ne moolau de kave i taamada, e deai donu se manuuia iai i muli mai.

²² Aude hagadaba, “Au e sui ange donu hegau baubau a dahi!” Koe haia Tagi Maolunga go dau tali, gai ia ga hagaola ai goe.

²³ Tagi Maolunga e kino i denga mee hagahidi hadu muna, gai ia e dee malangilangi i denga mee hagabau hagasenga.

²⁴ Go Tagi Maolunga e dagina de haiava o tangada. Gai dee hee ai naa de hai a dahi dangada e donu ange ai gi de haiava oona e hano ai?

²⁵ De ngadi hagatoo donu dahi sigidaumaha dabu, e bei ssele oou e noodia ai laa; muli mai gai tangada gu dee baba ono lodo.

²⁶ De hodooligi heiangi e nonu ga hili de gau baubau; ia e hai de hagasii o de mee duuduu grain gi hano laa olaadeu elunga.

²⁷ De hagasaalunga o tangada go de laama a Tagi Maolunga e ssala ai laa gi gidee dagodo lodo alodahi o tangada.

²⁸ De abodonu ma de hai hegau i de mee abodonu e buibui de hodooligi, gai dono nohoanga hodooligi e duu ga makaga i dono hai hegau i de mee heohi.

²⁹ De mahamaha o de gau mmodo go olaadeu mahi, gai de mahamaha o de gau madumaatua go olaadeu biho sinasinaa.

³⁰ Denga mee hagammae hagalagolagohia e kave gee de baubau i daho tangada, gai de hagaduasala e hagagilimalali lodo o tangada.