Proverbs 2 - De Beebaa Dabu

Haigamaiana o de heiangi

¹ Dagu dama, noo koe e hagallongo agu muna ma de hagamogomogo agu muna adu gi de goe,

² ma de kana ange ga hagallongo gi donu ange goe aagena ga hai gi donu danuaa ange goe aagena;

³ gai noo koe e dangi ange gi dahi ai au iloo ma de ssili gi donu ange ai goe;

⁴ noo koe e ssala de heiangi bei dau ssala gi maua denga selevaa ma goloa hagamogomogo e gide ngadaa laa,

⁵ gai koe e donu ange naa gi dagodo de madagu i Tagi Maolunga, ma de maua de iloo mee o de Maadua.

⁶ I hiidinga go Tagi Maolunga e gaavadu de heiangi abodonu, gai go ia e daalaa adu dagodo o de iloo mee, ma de donu ange.

⁷ Ia e doange de heiangi e gaavange gi gilaadeu e heohi, ia se buibui niiolaadeu e dee haisala,

⁸ ma de hagaloosi ange haiava olaadeu e hai hegau i de mee heohi, ma de buibui haiava o ono dangada dabu.

⁹ Gai koe e donu ange naa gi de mee heohi ma de hagamodu heohi, ma de soe, aama haiava danuaa alodahi.

¹⁰ Go hiidinga de heiangi e gaavadu naa gi oo lodo, gai de iloo mee e hagamalangilangi naa goe.

¹¹ Doo maanetonu e buibui naa goe, gai doo donu ange e hagaloosi adu naa goe,

¹² ga hagaola goe mai i de haiava o de baubau ma mai i gilaadeu e hagahai ngadaa ina dangada i alaadeu muna,

¹³ gilaadeu e tili denga haiava ssoe gai ga seesee i haiava o de gohu;

¹⁴ gilaadeu e malangilangi i de hai mee dee heohi ma de llodo danuaa i de hagammahi e hai de baubau;

¹⁵ gai olaadeu haiava e pigo, gai gilaadeu e hai hegau i de hagasenga.

¹⁶ De heiangi e buibui goe i de hine dagodo haisala, ma de hine baubau e hagasengalia laa goe i ana muna;

¹⁷ go de hine gu tili dono bodu ne hai i de masavaa oona se damaa hine ai, ma de ngalo de hagatoo donu aana gu hai i mada luu mada o de Maadua.

¹⁸ De haiava ange gi dono hale e hano ga duu ange gi de magau, gai ono haiava e hulo ga tuu ange gi de gau maakau;

¹⁹ e deai donu se daane e hano gi ono daha e ahe mai aabe e maua de haiava o de mouli.

²⁰ Gai koe gi daudali i de haiava o de gau danuaa, ma de seesee i haiava o olaadeu e heohi.

²¹ I hiidinga go gilaadeu e heohi e nnoho i honga de henua, gai go gilaadeu e dee haisala e doe ga nnoho i kilaa;

²² aagai de gau baubau e hai naa gi dee nnoho i de henua, gai dangada e dee hai hegau i de mee abodonu e hai naa gi hulo gee mai i kilaa.