Proverbs 19 - De Beebaa Dabu

¹ Tangada hagaau aloha e hai hegau laa i de mee heohi, e danuaa ange i tangada lodo senga ma de hadu muna.

² E dee danuaa de lodo o tangada i dahi mee gai e deai sono iloo mee, gai be goai e hagamoolau e hano, e dee gidee naa e ia de haiava.

³ Tangada lodo senga e oha dono mouli, gai ono lodo e hagabaubau Tagi Maolunga.

⁴ De lava o tangada e hai ga soa ono soa, aagai ssoa o tangada hagaau aloha e tili naa ia.

⁵ Tangada tala hagadonu hhadu muna e dee haihai naa donu ga dee hagaduasala, gai tangada e daalaa muna hhadu e dee ola naa donu.

⁶ E soa dangada e ssala de abodonu i dahi dangada maolunga; gai dangada alodahi ni soa niio tangada e gaavange mee ngadi gaavange.

⁷ Dangada o tangada hagaau aloha e hagangadi mee ia, gai ono soa e kii ange donu de hagammao gee i de ia! Gai ga hagammahi naa donu ia ga dangidangi ange gi gilaadeu, gai ia e dee gidee donu gilaadeu.

⁸ Tangada e haia gi heiangi ia, e hagamogomogo dono mouli; tangada e haia gi donu ange ia, e hagadagadaga age.

⁹ Tangada tala hagadonu hadu muna e hagaduasala donu, gai tangada e daalaa denga muna hadu e magau donu.

¹⁰ Tangada lodo senga e dee heohi ange gi de mouli i mee danuaa — gai e kii ange donu de baubau noo dahi dangada hai hegau e dagi de gau aamua.

¹¹ Tangada maanetonu e dee moolau de lili, gai ia e hagadubulia i dono dee anga ange gi de haisala ange o dahi gi de ia.

¹² De bole o de hodooligi e bei de hagangolo o de laiono, aagai dono abodonu e bei de mee suungia e hano iho laa gi honga helii.

¹³ Tama lodo senga e hagahai ngadaa dono damana, gai de hine dau bodu lodo hagadaumee e bei madaua vai e dee tuu laa de too iho.

¹⁴ Denga hale ma de lava ni mee ne bolo mai i daho denga maadua, aagai de hine dau bodu heiangi se mee mai i daho Tagi Maolunga.

¹⁵ De vaiduu e hai e seni donu huu, gai tangada ngadi noho e hiigai.

¹⁶ Be goai e daohia de hainga e buibui dono mouli, aagai be goai e hagangadi mee ina ono haiava e magau donu.

¹⁷ Be goai e abodonu ange gi de gau hagaau aloha, e gaavange ana mee gi Tagi Maolunga, gai Tagi Maolunga e hagao ange naa donu ana hegau.

¹⁸ Haelea dau dama, i de masavaa goi hanu ai haigamaiana; aude lodo i dono magau.

¹⁹ Tangada moolau de lili e hagaduasala donu, gai noo koe e hagaola ia, gai koe e ahe ange ga hagaola ia.

²⁰ Kana ange hagalaangona muna bale ma de daohi denga agoago, gai koe e sula naa ga se dangada heiangi i muli mai.

²¹ E lagolago hagatau i lodo o tangada, aagai go hagatau donu huu a Tagi Maolunga e ssula.

²² De mee e heohi i de hai go de abodonu; gai e danuaa ange de hagaau aloha o tangada i dono hai ga se dangada hadu muna.

²³ De madagu i Tagi Maolunga e hano ga duu ange gi de mouli, gai e hai tangada ga baba ono lodo, gai e dee duu ange gi de hai ngadaa.

²⁴ Tangada vaiduu e velo ange dono lima gi lo te gumedi; gai e dee maua i de hagaahe age gi dono ngudu!

²⁵ Hagailiilia tangada doo mee, gi heiangi ai tangada lodo senga; hagaseegina tangada heiangi, gai e kii ange naa dono iloo mee.

²⁶ Tangada e vaivai haia dono damana ma de alualu dono dinana se dama hagadookaa dangada ma teai sana hagadubu.

²⁷ Dagu dama, noo koe e dee hagallongo ange gi denga agoago heohi, gai koe e hano gee naa i muna o de iloo mee.

²⁸ Tangada tala hagadonu hadu muna e hagangadi mee de hagamodu heohi, gai de ngudu o tangada baubau e holo de baubau.

²⁹ De hagaduasala e baba ange gi de gau doo mee, gai de hagailiili se mee ange gi dua o de gau lodo ssenga.