Proverbs 18 - De Beebaa Dabu

¹ Tangada e vvae gee laa ia ma dangada, e maanadu donu huu ia, gai ia e hai baasi ange gi denga hagamodu heohi alodahi.

² Tangada lodo senga e dee malangilangi i de hai gi donu ange ia, aagai e lodo donu huu e tala ana mee e maanadu.

³ De masavaa naa huu e humai ai de baubau, gai de hagangadi mee e humai hogi, gai hagadogaa e humai hogi madali tee hagadubu.

⁴ Muna a tangada e tala e bei de vai gelo, aagai tagelo o de heiangi e bei ssaalingaa vai e sali laa.

⁵ E dee danuaa doo hagabuni ange gi tangada baubau, aabe go de hagamodu muna o tangada tigi haisala i mee dee heohi.

⁶ Muna a tangada lodo senga e hai ga hebagi dangada, gai ana muna e hai ga daia ia.

⁷ Muna a tangada lodo senga e hagabaubau donu huu ia, gai ana muna e nnoa donu huu ia.

⁸ Muna a tangada hai samu e bei denga amuamu gai mammami, gai e hulo donu ga ulu gi lodo o tangada.

⁹ Tangada vaiduu i de hai ana hegau, se daina niio tangada e oohaa mee.

¹⁰ De ingoo o Tagi Maolunga e bei de hale buibui makaga; tangada heohi e savini ga hano aagena gai ia gu ola.

¹¹ Goloa lagolago o de gau llava go delaadeu aduhale buibui; gai gilaadeu e maanadu bolo e bei de buibui maolunga.

¹² De hagaodi o de lodo maolunga o tangada go de magau, gai de hagaodi o de lodo maolalo go de hagadubu.

¹³ Tangada e basa laa i mua dana noho ga hagallongo, se dangada lodo senga ma de hagadogaa dangada.

¹⁴ Tangada e maua i de hagauda dono magi, aagai goai e maua i de hagauda de mmae o de lodo?

¹⁵ Tangada heiangi e lodo e hai gi maua e ia de iloo mee, gai luu dalinga o tangada heiangi e ssala de iloo mee.

¹⁶ De ngadi gaavange e hhuge ange de haiava o tangada, gai e hai gi maua e ia i de duu i mada i mua o de gau aamua.

¹⁷ Tangada e daalaa dono heohi i mua, e dulagi be go ia e heohi, ga dae ai gi de humai o dahi ga hai ssiilingaa muna.

¹⁸ De hai tada e hai gi dee hagadaumee dangada, ma de vvae magavaa o de gau mmahi e hai baasi laa.

¹⁹ Tangada gu lili laa e makaga ange ono lodo i de aduhale buibui makaga, gai de hagadaumee e bei baalanga hagamakaga o de hale buibui makaga.

²⁰ Muna a tangada e aahe ange naa donu huu gi de ia; gai ia e kave naa donu hua o ana muna e tala.

²¹ Muna a tangada iai ssauaa o de mouli aama de magau, gai dangada e aaloha ai e gai naa donu huu alaadeu muna.

²² Tangada e gidee laa dahi bodu moona gu gidee dahi mee danuaa, gai Tagi Maolunga gu abodonu ange gi de ia.

²³ Tangada hagaau aloha e dangidangi, aagai tangada lava e pada ana muna e basa ange ai.

²⁴ Tangada e soa laa ono soa, e duu ange naa donu gi de hai ngadaa, aagai e dahi dangada se soa e kii ange de baa ange gi de ia i dono daina donu.