Proverbs 16 - De Beebaa Dabu

¹ Tangada e hai denga hagatau i ono lodo, aagai go Tagi Maolunga e gaavange muna e basa ange ai.

² Tangada e maanadu bolo ana hegau alodahi e gilimalali, aagai Tagi Maolunga e hagahidi dagodo o ono lodo.

³ Hagatuulia ange au hegau gi Tagi Maolunga, gai au hagatau e hagadagadaga age naa donu.

⁴ Tagi Maolunga e hagahai hegau mee alodahi gi bei dana hagatau; ia e hagadabena ange donu hogi tangada baubau gi de laangi o de hagaduasala.

⁵ Tagi Maolunga e kino i dangada hagamaolunga alodahi. Ni muna abodonu, de gau bee nei e dee haihai naa donu ga dee hagaduasala.

⁶ Go de aloha ma de hai hegau i de mee abodonu e maatala ai haisala, gai de madagu i Tagi Maolunga e hai tangada gi hano gee i de baubau.

⁷ De masavaa naa huu a tangada e hai ai ga malangilangi Tagi Maolunga, gai ia e hai donu hogi ono hagadaumee gi hagadanuaa ange gi de ia.

⁸ E danuaa ange doo hagaau aloha, gai koe e hai hegau i de mee heohi, i dau mau goloa lagolago gai koe e dee hai hegau i de hagamodu heohi.

⁹ Tangada e hai denga hagatau i ono lodo, aagai go Tagi Maolunga e hilihilia de hai e hai ai.

¹⁰ De hodooligi e basa i ssauaa o de Maadua, gai dono ngudu e dee hagahaisala de hagamodu heohi.

¹¹ De mee haide ma de mee hagabau heohi ni mee nii Tagi Maolunga; gai mee alodahi e hagahidi go ia ne haia.

¹² Denga hodooligi e kino i de hai a dangada denga hegau baubau, go hiidinga de nohoanga hodooligi e hagaduu ga makaga i de heohi.

¹³ Denga hodooligi e malangilangi i tangada e daalaa de muna abodonu, gilaadeu e aaloha i tangada e daalaa de mee abodonu.

¹⁴ De bole o de hodooligi e bei tangada e gaamai longo o de magau, aagai tangada heiangi e maua i de hagasili dono bole.

¹⁵ Ga malangilangi naa huu de hodooligi, gai gu mouli dangada, gai dono abodonu e bei de hagausinga e pala iho ai laa de langi.

¹⁶ E danuaa ange dau hai gi heiangi goe i de hai gi lagolago au goolo, ma dau hilihili gi donu ange goe i dau hai gi lagolago au selevaa.

¹⁷ De haiava o dangada e haia de mee heohi e hagaui gee i de baubau, gai tangada e dagidiiloo dono haiava e hagaola dono mouli.

¹⁸ De hagaodi o de hagamaolunga go de magau, gai de hagaodi o de lodo maolunga go tee sula o tangada.

¹⁹ E danuaa ange doo lodo maolalo gai e noho i magavaa o de hagaau aloha, i dau vaevae goloa ne maua i de hebagi madali de gau hagamaolunga.

²⁰ Tangada e daohia laa mee oona gu agoago ai e hagadagadaga age donu, gai tangada e hagadonusia Tagi Maolunga e manuuia.

²¹ Tangada heiangi e hagabinga bolo se dangada e donu ange, gai muna maamaane e hai ga hai ngaohie de agoago ange dangada.

²² De heiangi go de vai o de mouli ange gi gilaadeu gu gaavee, aagai de lodo senga e hagaduasala gilaadeu e lodo ssenga.

²³ Lodo o tangada heiangi e dagi ana muna e tala, gai ana muna e maua i de usuusu ange dangada.

²⁴ Muna a tangada abodonu e bei denga hooni, e maimai ange gi tangada, ma de hagammahi dono angaanga.

²⁵ E dahi haiava e dulagi be se haiava heohi ange gi tangada, aagai e hano ga duu ange gi de magau.

²⁶ De lodo o tangada e gaimee e hai ia gi hai hegau, gai dono saalohia e hagammahi ange ia gi hai hegau.

²⁷ Tangada e deai ono haigamaiana e hagatau de hai de baubau, gai ana muna e bei de ahi e duungia laa mee alodahi.

²⁸ Tangada hadu muna e hai ga dee heloongoi dangada, gai tangada hai samu e hagabaubau magavaa o denga hai soa.

²⁹ Tangada alasala e hagatale tangada e baa ange gi de ia, ma de dagi ia i dahi haiava dee danuaa.

³⁰ Tangada e hagadabadaba ina laa luoono mada e maanadu de hai de baubau; gai tangada e hagalloa ina laa luoono malaungudu e noho e hai de baubau.

³¹ De biho sinasinaa e bei de hau mahamaha; de mee nei e maua i daho tangada e heohi.

³² Tangada e golomagi ina laa ono lodo e danuaa ange i dahi daane dau o de hebagi, tangada e golomagi ina ono lodo i dono lili e danuaa ange i taane e hagadee kii ina dahi aduhale.

³³ Dangada e dada denga laagau, aagai go Tagi Maolunga e hagamodu ina mee alodahi.