Proverbs 15 - De Beebaa Dabu

¹ De muna maamaane e tuu de bole, aagai muna pada e hai ga lili tangada.

² Muna a tangada heiangi iai de iloo mee, aagai muna a tangada lodo senga e hagaago mai dono senga.

³ Luu mada o Tagi Maolunga i mommee alodahi, ia e dagitilo de gau baubau aama gilaadeu e danuaa.

⁴ De muna maamaane e bei de manu somo o de mouli, aagai tangada e daahangadia dangada e hagammae lodo o tangada.

⁵ Tangada lodo senga e hagangadi mee de haelenga a dono damana, aagai tangada e anga ange laa gi dono hagaheohi ina se dangada maanetonu.

⁶ De hale o tangada heohi e honu i goloa hagamogomogo, aagai de hagaoanga o tangada baubau e gaavange gi gilaadeu de hai ngadaa.

⁷ Muna a tangada heiangi e hagalagolago de iloo mee; gai e dee aanei dagodo lodo o de gau llodo ssenga.

⁸ Ssigidaumaha a tangada baubau se mee hakino gee i daho Tagi Maolunga, aagai ia e malangilangi i dalodalo a dangada e heohi laa.

⁹ Hegau a tangada baubau ni mee hakino gee ange gi Tagi Maolunga, gai ia e aloha i tangada e hagaduu ngae ma e ssala de mee heohi.

¹⁰ Tangada e hano gee laa i de haiava heohi e kona dono haelenga, gai tangada e kino laa i dono hagaheohi ina e magau naa donu.

¹¹ De mommee o de gau maakau ma Abaddon e maahuge i mada luu mada o Tagi Maolunga, gai lodo o dangada e kii ange donu de maahuge ange gi de ia.

¹² Tangada doo mee e kino i muna hagaheohi; gai ia e dee ssili ange dahi mee gi tangada heiangi.

¹³ De lodo e malangilangi laa e hai luu mada o tangada ga malangilangi, aagai de lodo hinangalosaa e hagadaemaha de hagasaalunga o tangada.

¹⁴ Tangada e donu ange laa e lodo e hagalaumalie dono iloo mee, aagai tangada lodo senga e noho donu huu i dono ssenga.

¹⁵ Laangi alodahi o tangada e vaivai haia e baubau, aagai tangada e lodo malangilangi laa, e bei tangada e daonga laa i masavaa alodahi.

¹⁶ E danuaa ange de sogoisi oo goloa gai koe e madagu i Tagi Maolunga, i de lagolago oo goloa gai koe e dee baba oo lodo.

¹⁷ E danuaa ange de haigai e hai denga manu ssomo, gai dangada e hagadau aaloha, i de haigai e hai i de kaau bedi gai dangada e hagadau kino.

¹⁸ Tangada e moolau laa de lili e hai ga hagadaumee dangada, aagai tangada e golomagi ina ono lodo e hai ga tuu de hagadaumee o dangada.

¹⁹ De haiava o tangada vaiduu e buibuia i manu daladala, aagai de haiava o tangada heohi, gu hai ma gu se haiava soe.

²⁰ Tama daane heiangi e hai ga malangilangi dono damana, aagai tangada lodo senga e hagangadi mee dono dinana.

²¹ De lodo senga e hagamalangilangi ange gi tangada senga, aagai tangada e dahi ono donu ange e seesee i de mee heohi.

²² Denga hagatau e dee ssula noo e deai muna bale, aagai de gau hagasaele soa e hai ga ssula denga hagatau.

²³ Tangada e malangilangi laa i de basa ange i de muna heohi, gai se mee danuaa mmao de tala de muna e heohi ange gi de masavaa!

²⁴ De haiava o tangada heiangi e duu ange gi de mouli, gai e daohi ia gi dee hano iho gi mommee o de gau maakau.

²⁵ Tagi Maolunga e oha de hale o tangada hagamaolunga, aagai ia e hai gi dee hagangaalue ina goinga o de hine gu magau dono bodu.

²⁶ Tagi Maolunga e kino i maanadu a tangada baubau, aagai ia e malangilangi i muna alaadeu e gilimalali.

²⁷ Tangada nnoo hagamau mee, e hagahai ngadaa dono huaabodu, aagai tangada e kino i denga ngadi gaavange hagasenga e mouli donu.

²⁸ Tangada heohi e maanadu i mua dono basa, aagai tangada baubau e tala donu huu muna baubau.

²⁹ Tagi Maolunga e mmao gee i de gau baubau, aagai ia e hagallongo dalodalo alaadeu e heohi.

³⁰ Tangada malangilangi e hagamalangilangi lodo o dangada, gai longo danuaa e hagalodo mmahi lodo o dangada.

³¹ Tangada e hagalaangona muna o de mouli e hagaheohi ange ai laa ia, e noho i magavaa o de gau heiangi.

³² Tangada e hagangadi mee ina laa dono hagaseegina e hagangadi mee donu huu ia, aagai tangada e anga ange gi dono hagaheohi ina e kii ange naa de heiangi.

³³ De madagu i Tagi Maolunga e agoago ange tangada i de heiangi, gai de lodo maolalo e humai i mua de hagadubu.